شاوخوا یوه اوونۍ وړاندې د فاریاب والي نقیبالله فایق د یاد ولایت د نوي امنیې قوماندان د پېژندې په غونډې کې طالبانو ته ګواښ وکړ چې د جوزجان ـ فاریاب پر لویه لاره د امنیتي ځواکونو د اکمالاتي کاروان مخه و نه نیسي، کهنه ورک به یې کړي.
خو د ۸ ورځو په تېرېدو دغه کاروان لا هم د فاریاب مرکز مېمنې ښار ته رسېدلی نهدی.
دغه کاروان په څو سیمو کې د طالبانو له برید سره مخ شوی او دغه راز یو شمېر زیاتې کورنۍ هم د جګړې له امله د خپلو کورونو پرېښودو ته اړ شوې دي.
تازه ۲ زره کورنۍ د فاریاب په شېرینتګاب ولسوالي کې له خپلو کورونو وتلي او د ولسوالي په بازار کې یې اړولي دي.
د فاریاب د شېرینتګاب ولسوالي سیمهییز چارواکي وايي، یادې کورنۍ د ولسوالي په مرکز کې په بد وضعیت کې ژوند کوي.
د شېرینتګاب ولسوالي سرپرست امنیه قوماندان میرحمزه شېرزاد سلاموطندار ته وویل چې د بېځایه شویو کورنیو وضعیت د اندېښنې وړ دی، د خوړو توکي او د خوب ځای نهلري او د ولسوالي د بازار په پارک کې ژوند کوي.
په همدې حال کې د شېرینتګاب ولسوالي ولسوال سیدشرفالدین سلاموطندار ته وویل، تر اوسه له بېځایه شویو سره هېڅ مرسته شوې نهده او دوی ورته یوازې وچه ډوډۍ وېشلې ده.
بلهخوا د یادې ولسوالي اوسېدونکي سیداحسانالله او محمدحسن وايي، د شېرینتګاب ولسوالي سلګونه کورنیو د طالبانو او امنیتي ځواکونو ترمنځ د جګړې له کبله خپل کورونه پرې ايښي او په لارو او پارکونو کې اوسېږي.
د دوی په وینا، طالبان د امنیتي ځواکونو پر وړاندې د خلکو له کورونو سنګرونه جوړ کړي او همدا لامل دی چې ټولو له خپلو سیمو کډې کړې دي.
د فاریاب د کډوالو او بېرته راستنېدونکیو چارو ریاست که څه هم مني چې تر اوسه له یادو بېځایه شویو کورنیو سره مرسته شوې نهده، خو وايي، سر له سبا به یې د وضعیت پر څېړلو پیل وکړي.
دا په داسې حال کې ده چې له تېرو څو اوونیو راهیسې د فاریاب اندخوی په څلورګونو ولسوالیو کې د امنیتي ځواکونو او وسلهوالو طالبانو تر منځ د جګړو له امله ۴ زره کورنۍ بېځایه شوي او د اندخوی ولسوالي مرکز ته کډه شوې دي.
