ځینو منتقدینو ته د زرغون بهیر د مشر او د دولت جوړونکي ټیم د لومړي مرستیال امرالله صالح له خبرداري پوره یوه میاشت او څو ورځې وروسته چې ویلي یې و: «د شک او ګمان پر اساس نورو ته بېحرمتي او بد ویل، ستاسو اخروي او دنیوي قضیه غښتلې کوي.» په تازه مورد کې د زرغون بهیر یو شمېر کسان پر صالح د نیوکو له کبله لویې څارنوالي ته ور پېژندل شوي دي.
د لویې څارنوالي ویاند جمشېد رسولي سلاموطندار ته وویل، زرغون بهیر ۷ کسان د ښاغلي صالح فېسبوکي راپورونو کې د سپکاوي په تور دغې ادارې ته ور پېژندلي دي.
د رسولي په وینا، د هېواد د نافذه قوانینو او د جزا کوډ پر بنسټ سپکاوی او بېحرمتي جرم شمېرل کېږي او په همدې دلیل موضوع د لویې څارنوالي تر څېړنې لاندې نیول کېږي.
په ورته وخت کې د افغانستان د ازادو او خپلواکو رسنیو د ملاتړ ادارې یا نی مشر عبدالمجیب خلوتګر وايي، د صالح وروستي اقدامات د بیان له ازادۍ سره د استخباراتي چلند په مانا دی او دا کار د هېواد د اساسي قانون خلاف دی.
د خلوتګر په وینا، کله چې نیوکه او نیوکې د خلکو په مزاج ښې ونه لګېږي، نیوکګر باید د رسنیو د تخطیو کمېسیون ته ور وپېژندل شي چې یاد کمېسیون د موضوع په اړه وروستۍ پرېکړه لویې څرنوالي ته واستوي.
د دې ترڅنګ د مجازي شبکو یو شمېر کارونکیو هم د امرالله صالح پر دغه ګام نیوکه کړې او ویلي یې دي چې ښاغلي صالح خپل فېسبوکي پوسټ ته د اقتصاد وزارت د یوه کارکوونکي د انتقادي نظر وړاندې کولو په خاطر، لویه څارنوالي له یوه کارکوونکي پوښتنو کولو ته اړ کړې ده.
د اقتصاد وزارت کارکوونکي د ښاغلي غني له معاونیت وړاندې او وروسته د امرالله صالح د سیاسي دریځ بدلولو له کبله هغه بېشرمه بللی و.
