د بشري حقونو دفتر د طالبانو لیکو کې د کمکیو ځوانانو په موجودیت اندېښنه ښيي

د غور ولایت د بشري حقونو ولایتي دفتر رییس ذبیح الله جواد سلام وطندار ته وویل، د ناامنیو زیاتېدل، د نامسوولو وسله والو فعالیت، خراب اقتصادي حالت او د ماشومانو له حقونو د کورنیو ناخبري د دې لامل شوي، چې یو شمېر تنکي ځوانان د وسله والو ډلو له خوا لیکو ته ورجذب شي.

د جواد پر وینا، داسې اسناد یې ترلاسه کړي، چې وسله والو طالبانو او نامسووله قوماندانانو په ناامنو سیمو کې کمکي ځوانان د سرتېرو په نوم خپلو لیکو ته وربولي.

په دې اړه د غور د والي ویاند عبدالحی خطیبي وویل، طالبان او نامسووله قوماندانان، چې شمېر یې شاوخوا ۴ زرو ته رسیږي، له کمکیو ځوانانو د سرتېرو په توګه کار اخلي.

خطیبي وايي، دغه کار تر ډېره په هغو سیمو کې کېږي، چې د دولت له واکه وتلې دي او دوی هڅه کوي، د طالبانو او د نورو وسله والو ډلو ليکو ته د ځوانانو ورتګ مخه ونیسي.

په همدې حال کې د غور ولایت د کار او ټولنیزو چارو رییس ګل احمد عثماني وايي، د سرتېرو په توګه د تنکيو ځوانانو جلب او جذب د دې لامل کېږي، چې د ټولنې دغه برخه خپله جسمي او فکري وده له لاسه ورکړي.

د عثماني پر وینا، د عامه پوهاوی د پرګرامونو له لارې یې د امنیتي سرتېرو په توګه د کم عمره ځوانانو له جذب مخنیوی کړی او د دغه ولایت له ۲ زرو زیاتو ماشومانو ته یې پیغام لېږلی، چې د وسله والو په لیکو کې د هغوی جذب دوی ته څومره ګواښونه او زیانونه وراړوي.

له دې مخکې غور ولایت ته د امنیتي ځواکونو په لیکو کې د کم عمره ماشومانو د موجودیت په اړه له مرکز کابله یو پلاوی ورغلی و، چې له څېړنې وروسته یې د امنیتي ځواکونو په لیکو کې د ماشومانو موجودیت په اړه هېڅ ترلاسه نه کړل.