د افغانستان له خپلواکو رسنیو د ملاتړ ادارې یا نی مسوولانو نن په کابل کې یوې خبري غونډې ته وویل چې حکومت په دولتي پوستونو کې د خبریالانو او رسنوالو په ګومارلو سره رسنیو کې نفوذ وکړي او په راتلونکي کې د هغو په واسطه رسنۍ سانسور کړي.
د نی ادارې اجراییوي مشر مجیب خلوتګر وايي، پنځه کاله مخکې د افغانستان د غږ او رسنیو ازادي د ستاینې وړ وه؛ خو نن او سبا د رسنیو خبري سرویسونه د دولت په خوښه خپرېږي.
د ښاغلي خلوتګر په وینا، یو شمېر دولتي چارواکي د خبر او راپور د نه خپرولو بدل کې خبریالانو ته د پیسو او دولتي دندو وړاندیز کوي.
ښاغلی خلوتګر حکومت ته په رسنیو کې د نفوذ موندلو له هڅو نه د تېرېدلو او د افغانستان اساسي قانون ته درناوی کولو وړاندیز وکړ.
خو د ولسمشرۍ ماڼۍ سرپرست ویاند شاهحسین مرتضوري وايي، حکومت د رسنیو ازادي ته درناوی لري او هېڅکله هم د رسنیو په چارو کې لاسوهنه نهکوي.
مرتضوي له نی دفتره غوښتنه وکړه چې د رسنیو د کار پر وړاندې مسلکي چلند وکړي، نه سیاسي.
د افغانستان له خپلواکو رسنیو د ملاتړ ادارې چارواکي د رسنیو له مدیرانو غواړي چې د ازادۍ اصل ته درناوی وکړي او د حکومت د نفوذ مخه ونیسي.
