د فاریاب ولایت یوشمېر مدني فعالانو او خبریالانو د «لار مې چېرې؟» په نوم کمپاین پیل کړی او وايي، دغه کمپاین یې د هټۍوالو او کسبګرو لهخوا د پلې لارو او واټونو د تړل کېدو په غبرګون کې پیل کړی دی.
د فاریاب یو خبریال قطبالدین کوهي سلاموطندار ته ویلي، دغه کمپاین یې د چارواکو د خبرولو لپاره د خلکو په غوښتنه کړی دی.
کوهي زیاتوي، د فلزکارانو او ترکاڼانو په څېر ډېری کسبګر د سړک پر غاړو کار کوي او دغه سړکونه چې په درنو لګښتونو جوړ شوي، اوس د ویجاړېدو په حال کې دي. د هغه په خبره، چارواکي په دې برخه کې بېغوري کوي.
د فاریاب د مدني ټولنې یو فعال فېروز غفوري وايي، هټۍوال پلې لارې په اجاره ورکوي او دا کار له قانون سره په ټکر کې دی.
غفوري زیاتوي، د ښاروالي چارواکي په دې اړه بېغوري کوي او پر بندو لارو سترګې پټوي.
د میمنې ښاروال احمدجاوېد کیوان په دې اړه د میمنې ښاروالي بېغوري مني خو وايي، د وګړو د شمېر زیاتېدل او له ولسوالیو نه د زیاتو بېځایه شویو کورنیو راتګ هغه څه دي چې د دوی ستونزې یې یو په دوه کړې دي.
د میمنې ښاروالي چارواکي ډاډ ورکوي چې ډېر ژر به د دغې ستونزې د هواري لپاره ګامونه پورته او لاسګاډو او دستفروشانو ته به ټاکلی ځای په واک کې ورکړي.
