د مدنې ټولنو ګډې کاري ډلې د حکومتولۍ او فساد پروړاندې د مبارزې کمېټې نن په کابل کې له حکومته وغوښتل چې له نړیوالو معیارونو سره سم د فساد پروړاندې د مبارزې کمېسیون جوړ کړي.
مدني بنسټونو د حکومت اوسنۍ طرحې په اړه چې په پایله کې به یې د دوی په وینا سیاسي او تړلی کمېسیون جوړ شي، جدي اندېښنه وښوده.
د فساد پروړاندې د مبارزې قانون د تعدیل طرحې له مخې، ۵ دولتي بنسټونه ۲۵ کسان او د فساد پروړاندې د مبارزې اړوند مدني بنسټونه ۲۵ نور کسان د اداري اصلاحاتو او ملکي خدمتونو کمېسیون ته ورپېژني.
کمېسیون د هغوی له ډلې ۱۵ کسان ولسمشر ته ورپېژني او ولسمشر د هغو له منځه ۵ کسان د فساد پروړاندې د مبارزې خپلواک کمېسیون د غړیو په توکه غوره کوي.
خو مدني بنسټونه وايي، پهدې بڼه د کمېسیون د غړیو غوره کول د اداري فساد پروړاندې د مبارزې لهپاره د یوه خپلواک بڼست جوړیدو لامل نهشي کېدای.
پر روڼتیا د څار بنسټ اجرایوي رییس سیداکرام افضلي وویل، د سترې محکمې، د اساسي قانون پر پلي کېدو د څار خپلواک کمېسیون، د بشري حقونو خپلواک کمېسیون، اطلاعاتو ته د لاسرسي کمېسیون او د اداري فساد پروړاندې د مبارزې څارنې او ارزونې ګډې کمېټې استازي دې د سیالۍ بهیر له لارې د یوه مشخص جوړ شوي طرزالعمل له مخې چې مدنې ټولنو ته د منلو وړ وي، ۵ کسان وټاکي او ولسمشر دې بیا له دغو لسو کسانو ۵ وړ کسان د فساد پروړاندې د مبارزې خپلواک کمېسیون غړي وټاکي.
اړوند مطالب:
د افغانستان روڼتیا څار بنسټ نظرپوښتنې ردېدل
پر روڼتیا د څار بنسټ: کورني او بهرني غله دې پټې کړې پیسې بېرته راوړي
روڼتیا څار بنسټ: وکیلان په ملي بودیجه کې شخصي ګټې لټوي
افضلي ټینګار کوي، که د حکومت د اوسنۍ طرحې له مخې، د فساد پروړاندې د مبارزې خپلواک کمېسیون جوړ شي، دا یو دولتي او سیاسي کمېسیون دی او دوی ته د منلو نهدی.
موږ هڅه وکړه چې پهدې اړه د ولسمشر د ویاند دفتر نظر هم واخلو، خو بریالي نهشو.
فساد په افغانستان کې له جګړې وروسته ستره ستونزه ده چې په نړیواله کچه یې د هېواد باور ته سخت زیان اړولی دی.
