امریکا ولسمشر ډونالډ ټرمپ په اوهایو ایالت کې د وینا پرمهال ویلي، چې د پوځ متقاعد جنرال جیمز ماتیس یې د امریکې متحده ایالتونو دفاع وزارت څوکۍ ته ټاکلی دی.
ټرمپ په دې وروستیو کې له جنرال ماتیس سره په لیدنه کې د هغه ستاینه کړې وه.
۶۶ کلن جنرال ماتیس په افغانستان او عراق کې هم دندې کړي دي.
نوموړی د امریکا د متحده ایالتونو د سنټ کام مرکزي قوماندانۍ قوماندان هم پاتې شوی دی.
نوموړی درې کاله مخکې په ۲۰۱۳ کال کې له پوځ څخه تقاعد ورکړل شو.
جنرال ماتیس به د امریکې د سنا مجلس له خوا د انتصابي رایو په اخیستلو د دفاع وزیر په توګه وټاکل شي.
