د ایران د بهرنيو چارو وزیر جواد ظریف په خپله يوه انګليسي ويډيويي پېغام کې ویلي، چې ایران د خبرو اترو د پېل راهیسې د امريکا سره دومره پرمختګ نه وو کړی، خو په وینا يې بیا هم د خبرو اترو د برياليتوب له پاره خاص تضمين نشته.
نوموړي زياته کړې، چې د اټومي خبرو اترو په برخه کې باید دواړه لوري انعطاف وښيي.
جواد ظریف وايي، چې د خبرو اترو له پاره " هو" ميړانې او مصالحې ته اړتيا لري.
د ایران د بهرنيو چارو وزیر په خپله خپره شوې ويډيويي وينا کې، چې په يوټویوب کې خپره شوې دا هم ويلي، چې ایران د یو متعادل او ښې هوکړې له پاره چمتو ده.
نوموړي داعش ته په اشارې سره ويلي، چې د نړۍ له پاره ګواښونکې داعش ډله د پرمختګ په حال کې ده او او د امريکا سره دغه هوکړه باید له داعش ډلې سره د مبارزې په برخه کې هم وشي.
د ایران د بهرنيو چارو وزیر جواد ظریف له ويناوو دا څرګنديږي، چې دغه هېواد د امريکا متحده ایالاتو سره په خبرو کې پرمختګ کړی.
د ویلو ده، کله چې په ۲۰۱۳ زېږدیز کال کې د ایران واک حسن روحاني واخیست، نو د خپل هېواد نظام يې منځ لارې اعلان کړ او د محمود احمدي نژاد د څو کلن کړکېچ حلولو په موخه د امريکا متحده ایالاتو سره د خبرو اترو له پاره د ایران دروازې پرانستلې.
له وړاندې د امريکا د بهرنيو چارو وزیر جان کري ویلي وو، چې د ایران سره اټومي خبرو اترو پرمختګ کړی دی.
یاده دې وي، چې د دغې هوکړې څخه وروسته به ایران اټوم بمب نه شي جوړولی او په مقابل کې به پر ایران د امريکا او اروپايي اتحاديې له لوري اقتصادي بندیزونه هم لرې شي.
