تخار ولایتینینگ برشنا شرکتی مسووللری، قوراللی طالبلر بوگون (جمعه) ایرتلب قندوز ولایتیده آلچین کوپریگیگه هجوم قیلیب تاجیکستاندن کیلتیریله دیگن برقنی کیسگنلر دیدیلر.
تخار برشنا شرکتینینگ باشلیغی حاجی محمد مومندنینگ ایتیشیچه، حاضر تخار بیلن قندوزنینگ برق جریانی کیسیلیب قالگن. شونینگدیک منطقهده وضعیت یخشیلهنیشی بیلن برق جریانی توزهتیلیشی اوچون شرکتنینگ ملازملری یوباریلیشی کوتیلهدی. جناب مومند، تخار ولایتیده برق جریانینی اولش اوچون ایش باشلنگن دیدیلر.
باشقه تاماندن تخار پولیس قوماندانی خلیل اسیر درقد تومنینینگ یولی قیته آچیلیگنلیگی بارهسیده خبر بیریب ایتیشیچه، بوگون ایرتلب ملی کوچلر طرفیدن اوتکزیلگن حربی عملیاتده بو تومن قوراللی طالبلر قورشاویدن چیقاریلگن.
جناب اسیرگه کوره، هنوز هم درقد تومنینینگ القناق منطقهسیده آتیشمه جریانی بار. جنگده 4 طالب اولدیریلگن و 8 عصیانچی یرهلنگنی ایتیلهدی.
قوراللی طالبلر تامانی هنوز بو حقیده بیرار نرسه دیمه گن.
باشقه بیر خبرده مملکت شمالیده پامیر 20 فرقهنینگ سوزلاوچیسی غلام حضرت کریمی، افغان ملی کوچلرینینگ اوتگن کیچهدن بیری دام بیرگن اوروشلری عاقبتیده عصیانچی طالبلرنینگ 31تهسی اولدیریلگن دیگن. شونینگدیک قندوز – تخار یولینینگ ارهلیغیده جایلیشگن امام صاحب و چهار دره تومنیده هم 14 طالب قتل ایتیلگن. شوکبی اوروشده افغان ملی کوچلرینینگ بیر حربیسی اولدیریلگنلیگینی تصدیق قیلگن.
پامیر 20 – فرقهنینگ سوزلاوچیسی، جنگری طالبلر آلچین کوپریگینی پارتلتیش اوچون مذکور منطقهگه هجوم قیلگنلر.
عین حالده، نامی سیر سقلهنیش شرطی بیلن سلاموطندارگه خبر بیرگن بیر منبعنینگ بیلدیریشیچه، قندوز ولایتده کته خیل پوستهسی قوراللی طالبلر اشغالیگه اوتگن. ملی پولیسنینگ 9 حربیسی جنگریلر آرقهلی قولگه آلینگن. لیکن، هنوزگچه بو پوسته جنگریلر اشغالیگه اوتگنلیگینی امنیتی منبعلر اعتراف ایتمهگنلر.
