افغانستانده شفافیتنی کوزهتوچی ادارهنینگ بیلدیریشیچه، مدافعه و امنیتی بولیملرده جنگچیلرنی نفوذ قیلگنی همده ییریک فساد موجودلیگی مملکت دفاعی تیزیمینی قیینچیلیککه روپه ره قیلگن اولکن معما سنلهدی.
(TI) یا افغانستانده خلق ارا شفافیتنی کوزهتوچی ادارهنینگ تیکشیروی نتیجهسیده قولگه کیریتیلگن حساباتده افغانستان دفاعی همده امنیتی مدیریت نقطه نظردن قویی سطح ده تورگن. مذکور گزارشگه اشاره قیلگن شفافیتنی کوزهتوچی ادارهگه کوره، افغانستان مدافعهوی تدارکات بولیمی کوزگه کورینرلی رواجلنگنیگه قرهمی، لیکن مدافعهوی بولیمده موجود ییریک فساد مملکت ملی حربی کوچلری رویحهسیگه سلبی تاثیرهم قویگن. خلق ارا شفافیتنی کوزهتوچی ادارهنینگ بیلدیریشیچه، افغانستان ملی کوچلری اهالی خذمتیگه بولگنلیکدن علاوه جنگچیلرنی خذمتیگه بولیش اوچون مجبور ایتیلهدی.
افغانستانده شفافیتنی کوزهتوچی اجراییه رییسی سید اکرم افضلی نینگ سوزلریگه کوره، ملی بیرلیک حکومتی جنگچیلر قولینی مدافعهوی ادارهلردن کوتاه قیلمهگن حالده، مذکور ادارهلرده فساد کون – ساین آشیشی ممکن. جناب افضلی، مملکت مدافعهوی ادارهلرینینگ کیلیشووگه قولی بولیب، فسادگه یول قویگنلرنینگ هنوزگچه هیچ بیری عدلی و قضایی ادارهلرگه تنیشتیریلمهگن دیگن. جناب افضلی، افغانستان حکومتیگه یاردم کورسته دیگن دنیا جماعه چلیگیدن هم بو توغریده جدی نظارت بولیشینی سورهگن.
ملی بیرلیک حکومتی رهبرلرینینگ جواب بیرمهگنلیگی و دولت ادارهلریدهگی موجود ییریک فساد سیاسی، مالی، عملیاتی و تدارکاتی بولیم لرگه جدی ضربه بیرگنی ایتیلهدی.
عین حالده، افغانستان استراتیژیک مطالعات مرکزی ملی پولیس توغریسیدهگی بیرینچی تحقیقی گزارشینی ترقهتیب، اونده قومگرالیک، عدالتسیزلیک، فساد و خویشاوندگرالیککه اشاره قیلیب، بو ایسه افغانستان ملی کوچلری اوچون اوته یامان وضعیت بولگن لیگینی بیلدیرگن.
افغانستان ملی حربی کوچلری اورتهسیدهگی موجود قومگرالیک، همده تورلی معمالر موجودلیگی حقیده نیچه مرته گزارشلر ترقهتیلگن. ایتیلیشیچه، افغانستان مدافعه همده ایچکی ایشلر وزیرلیگی یوقاریده ایسله تیلگن مساله حل ایتیلیشی اوچون یقینده ینگی بیر لایحه اوستیده ایش باشلهگن. سیاسیتچیلرگه کوره، مذکور لایحه عملده تطبق ایتیلیشی بیلن ملی کوچلر ادارهسیگه تیزلیکده اوزگریش کلیشی ممکن.
