په جوزجان او سرپل ولایتونو کې له داعش ډلې د طالبانو بیعت کولو په موضوع کې د پردې ترشا بهرنۍ ډلې لاس لري.
د سرپل ولایتي شورا ځینې غړي د دې مطلب په څرګندولو وايي، شاوخوا ۲۰ بهرنۍ کورنۍ په سرپل او جوزجان ولایتونو کې په دې کار روان کړی، چې طالبان له داعش ډلې سره بیعت وکړي.
د سرپل ولایتي شورا رییس محمد نور رحماني سلام وطندار سره په مرکه کې وویل، دغه کورنۍ د ازبیکستان، ترکمنستان، اذربایجان او پاکستان هېوادونو پورې تړاو لري او له دغو هېوادونو راغلي دي.
رحماني وايي، دغو کورنیو له داعش ډلې د طالبانو د بیعت کولو کار عملا روان کړی او تراوسه یې د صیاد او کوهستانات ولسوالیو یو شمېر طالبانو له داعش ډلې سره بیعت اعلان کړی دی.
د ولایتي شورا رییس په فاریاب، جوزجان او سرپل ولایتونو کې د طاهر یولداش زوی ملک طاهر اوف د فعالیتونو په اړه اندېښنه وښودله.
د ده په خبره، بهرني وسله وال په کوهستانات ولسوالۍ کې روزنځایونه او ثابت مرکز لري.
رحماني وايي، که دولت په شمال کې د داعش ډلې د فعالیتونو مخنیوی ونه کړي دغه ولایتونه به له جدي ګواښ سره مخ کړي.
د جوزجان ولایت د درزاب ولسوال رحمت الله حشر په دې ولایت کې له داعش ډلې د طالب وسله والو له بیعت کولو څه نه وايي، زیاتوي، چې له یو څه وخت راهیسې د هېواد له یو شمېر سیمو پاکستاني او اوزبیکستاني جکړه مار د سرپل ولایت صیاد ولسوالۍ، د فاریاب ولایت بلچراغ او ګریزیوان او دغه راز د جوزجان ولایت د قوش تپې او درزاب ولسوالیو په سرحدي سیمو کې له پرمختللو جنګي تجهیزاتو سره ځای پر ځای شوي دي.
حشر دغه راز وايي، په قوش تپې ولسوالۍ کې د طاهر یولداش زوی پلوي پيدا شوي دي.
د سرپل د والي ویاند ذبیح الله اماني د سرپل او فاریاب ولایتونو په سرحدي سیمو کې د داعش ډلې د جلب او جذب خبر تاییدوي او وايي، د دغو ډلو د نابودولو لهپاره به ستر نظامي عملیات وشي.
