بغلان ولایتی مخدره ماده‌گه قرشی کوره‌شیش اداره رسمی‌لری‌نینگ ایتیشیچه، مذکور ولایت‌ده اوروش و ناتینچ‌لیک‌لر میزانی آشگنی باعث، کوکنار ایکینی اوتگن ییل‌گه قره‌گنده ایکی برابر کوپه‌یگن.
بوگون (یکشنبه) خبری بیر ییغینده سوزگه چیقگن بغلان ولایتی مخدره ماده‌گه قرشی کوره‌شیش اداره باشلیغی فضل‌الحق اندرابی‌نینگ ایتیشیچه، اوتگن ییل مذکور ولایت‌ده 110 هکتار ییرگه کوکنار ایکیلگن ایدی، بیراق بو رقم جاری ییل‌ده 200 هکتارگه ییتیشگن.
مذکور ولایت‌نینگ اندراب، بنو، ده‌صلاح، بُرکه، جلگه و تاله‌و برفک تومن‌لریده بو ییل کوکنار کوپ ایکیلگن دییله‌دی.
جناب اندرابی‌گه کوره، مذکور ولایت‌نینگ کوپینچه منطقه‌لریده جنگری طالب‌لر حاکم‌لیگی، ناقانونی قورال‌لی کیشی‌لر موجودلیگی، امنیتی کوچلرنینگ بی‌فرق یانده‌شیشی و ایکینچیلیک باشقه محصولاتی‌نینگ بهاسی کم‌لیگی کوکنار ایکینی میزانی آشیشی‌گه سبب بولگن.
اندرابی، مخدره ماده‌گه قرشی کوره‌شیش خاص پولیس کوچلریدن، مذکور ولایت‌ده کوکنار ایکینینی نابود ایتیش اوچون، جدی چاره تدبیر کوریشینی سوره‌دی.
شونینگ‌دیک، بغلان پولیس قومندانلیگی مخدره ماده‌گه قرشی کوره‌شیش مدیری سمونوال نظام‌الدین نظام، مذکور ولایت‌ده کوکنار ایکینی میزانی آشگنینی تصدیق‌لب ایتیشیچه، مخدره ماده‌گه قرشی کوره‌شیش پولیسی، دوام ایتیب کیله‌یاتگن اوروش باعث، بو ییل کوکنار ایکینزارلرینی نابود ایته آلمه‌گن.
عین حالده، جناب نظام، اوتگن 14 آی‌ده 145 قاچاقچی 1806 کیلو گرام مخدره ماده بیلن قولگه آلینگنی‌دن خبر بیره‌دی.
