تخار ولایتی نینگ خواجهغار تومنی طالبان نظارتیگه اوتگنیدن سونگ، کوکچه اطرافیدهگی تومنلر جملهدن روستاق، چاهآب، ینگیقلعه، درقد، خواجهبهاوالدین و دشتقلعه تومنلرینینگ قتناو یوللری باغلنگن.
شونینگدیک، تخار ولایتی نینگ بهارک تومنی طالبان نظارتیگه اوتگنیدن سونگ، بو تومن قتناو یولی باغلنگن دیر.
طالبان گروهی اوتگن هفته "پنجشنبه" کونی خواجهغار و بهارک تومنی تصرف قیلگن ایدی.
تخار یشاوچیلری نینگ سلاموطندارگه ایتیشیچه، عمومی قتناو یوللر باغلنگن دیر و طالبان گروهی اونلرچه چکپاینت ایجاد قیلگن.
امنیتی بیرمنبع نینگ ایتیشیچه، امنیتی کوچلردن بیرقطاری بیر هفتهدن بویان خواجهغار تومنی نینگ «تپهتخم» منطقهسیده، طالبان قمراویگه قالگن.
منبع نینگ ایتیشیچه، طالبان گروهی خواجهغار تومنی یشاوچیلریدن عادی شکلده حیات کیچیریشلرینی سورهگن.
ملی مدافعه وزیرلیگی نینگ اعلان قیلیشیچه، تالقان شهری نینگ بیرقطار قیشلاقلری شونینگدیک، خواجهغار و بهارک تومنی طالبان وجودیدن تازهلنگن، بیراق تخار ولایتی کینگش اعضاسی سیدصلاحالدین برهانی نینگ ایتیشیچه، امنیتی کوچلر طالبان نظارتیگه اوتگن تومنلرنی اولر وجودیدن تازهلش خصوصیده سعی و حرکت قیلمهگن.
تخار پولیس قومندانلیگی سوزلاوچیسی خلیل اسیر نینگ ایتیشیچه، کوکچه اطرافیدهگی تومنلرنینگ قتناو یوللری یالغیز امنیتی کوچلر یوزیگه باغلنگن.
اونینگ ایتیشیچه، حاضرده تالقان شهری نینگ ابدال قیشلاغینی طالبان وجودیدن تازهلش اوچون عملیات باشلنگن و تیزلیککه کوکچه اطرافیدهگی تومنلرنینگ قتناو یوللرینی طالبان وجودیدن تازهلش اوچون حربی عملیات یولگه قوییلهدی.
شونینگدیک، چاهآب تومنیده هم آتیشمهنی دوامی بار و اوشبو تومن بازاری نینگ قطار بولیملری اوتگن نیچه کون جریانیده امنیتی کوچلر و طالبان آرهسیده، قولمهقول بولگن.
عینحالده، تخار یشاوچیلریدن بیرقطاری اوشبو ولایت امنیتی وضعیتی یمان بولگنی باعث، کابل شهریده اعتراض قیلگنلر.
اولر، مرکزی حکومتدن تخار ولایتیده جایلشگن امنیتی کوچلرنی تجهیزلنتیریب و غفلت قیلگن مسووللرنی وظیفهلریدن چیکلنتیریشینی سورهگن.
اوشبو اعتراضچیلر مرکزی حکومتدن ناقانونی قوراللی کیشیلر قوراللرینی توپلش اوچون سعی و حرکت قیلیشینی سورهگن.
