کنر ولایتی نینگ کنرخاص تومنیدن بولگن نعمتالله آتلی عسکر اوچ ییل حربی تشکیلاتیده خذمت قیلگن. بو عسکرنینگ عایلهسی کمیده 11 آی آلدین اونینگ اولیم خبرینی ایشیتگن و اونگه تیگیشلی دییلگن جسد عایلهسیگه تاپشیریلگن.
افغانستان بویلب کوپینچه ولایتلرده اوروش دوام ایتیب کیلماقده و کمیده 11 آی آلدین، ارزگان ولایتی نینگ چنارتوی تومنیده حربی کوچلریگه تیگیشلی بیر تولی اوستیگه طالبان گروهی هجوم قیلگن و بو تولی 48 ساعت طالبان گروهی نینگ قمراویده قالگن. تولی عسکرلریدن بیرقطاری طالبان گه قرشی آتیشمهده هلاک ایتیلگن و باشقه 5 تهسی طالبان گروهی تامانیدن توتقونگه آلینگن. شونینگدیک، نعمتالله آتلی عسکر توتقونگه آلینگنلرنینگ آرهسیده ایکن. بیراق، بو واقعهدن سونگ، اونگه تیگیشلی دییلگن بیر جسد عایلهسیگه تاپشیریلگن و قیغو-الم گه باتگن عایله شبهلی شکلده تانیلمهگن جسدنی توپراققه تاپشیرگن.
نعمتالله نینگ آتهسی شیرآغانینگ ایتیشیچه، عایلهسی یامان کونلرنی باشیدن کیچیرگن، بیراق اوغلی تیریک اویگه قیتگنیدن بوتون قیغولر کوککه اوچیب و جایینی خرسندلیک تولدیرگن.
ایتیلیشیچه، امنیتی کوچلر تامانیدن طالبان گروهی اوستیگه اویوشتیریلگن عملیات نتیجهسیده نعمتالله باشقه محبوسلر بیلن بیرگه طالبان گروهی نینگ قماقخانهسیدن قوییب یوباریلگن.
طالبان گروهی نینگ قماقخانهسیدن 10 آی تورلی مشقتلرنی اوتکزگن اوشبو حربی عسکرنینگ ایتیشیچه، طالبان گروهی محبوسلرنی کلتکلب و قیناققه سالیش گه علاوه، اولرنی آغیر ایشلرگه زورلهگن.
نعمتالله نینگ ایتیشیچه، توتقون دورانیده کیچه-کوندوز عایلهسی اوچون خواطرلنگن. اونینگ ایتیشیچه، اویگه قیتگنیدن سونگ، کوزی آتهسی و آنهسیگه توشگنده کوز یاشینی توختهتیش گه قادر بولمهگن.
نعمتالله نینگ دوستلریدنب یری شفیعالله نینگ ایتیشیچه، نعمتالله نینگ اولیم خبرینی ایشیتگنده کوز یاشیگه توسیق بوله آلمهگن و تیریک قیتگنیدن سونگ، خرسندلیک یاشی توکهدی.
نعمتالله نینگ آتی گه جسدی توپراققه تاپشیریلگن عسکرنینگ عایلهسیدن حاضرگچه هیچ بیر معلومات قولگه کیریتیلمهگن.
