قندوز ولایتی محلی رسمیلرینینگ ایتیشیچه، امنیتی کوچلر بیلن طالبلر اورتهسیده یوزبیرگن توقنهشوولرده 670 طالب، 22 امنیتی عسکر و 70 تینچ اهالی هلاک بولگن.
قندوز والیسی حمدالله دانشینینگ (سهشنبه کون) بیر خبری ییغینده ایتیشیچه، قندوز شهریده یوزبیرگن ایکی هفتهلیک اوروشده 350 طالب، 180 تینچ اهالی و امنیتی کوچلردن کمیده 70 تهسی یرهلنگن.
توقنهشوولر اوشبو ولایت 6- میزان باشلندی و طالبلر بیر کونده مذکور شهرنی قولگه آلدی.
قندوز شهری اوچ کون طالبلر نظارتیگه قالدی؛ بیراق امنیتی کوچلر قیتهدن مذکور شهرنی نظارتگه آلدی و ایکی هفتهدن کیین، بوتونلهی طالبلردن تازهلندی.
قندوز شهری طالبلر قولیگه (توشگن کون کیچ قورون) امنیتی ییریک رسمیلر بیر خبری ییغینده، تیزلیکده مذکور شهر نظارتینی قولگه آلیب و قندوز سقوطیگه قولی بار کیشیلر آتی فاش ایتیلیشینی ایتکن ایدی.
شونینگدیک افغانستان جمهورلیک ریاستینینگ ایتیشیچه، طالبلر قندوزده کوپینچه جنایتلرگه قول اورگن و بو واقعهنی تیکشیریش اوچون بیر هیأت یوباریلدی.
اوشبو هیأت معارف سابق وزیری فاروق وردک و ملی خوفسیزلیک سابق باشلیغی امرالله صالح ریاستیده قندوز بارگن و کیلهسی هفته تیکشیرولرینی یکونلنتیریشی ممکن.
عین حالده، قندوز ولایتی کینگش باشلیغی یوسف ایوبینینگ سلاموطندارگه ایتیشیچه، قندوز توقنهشوولری تلفاتی توغریسیده دقیق رقم قولگه کیریتیلمهگن و بو رقمنی تصدیق یا رد قیلهآلمهیدی. اونگه کوره، قندوز واقعهسی تلفاتی توغریسیده تیکشیرولر دوام ایتماقده.
