د بدخشان ځېنې بڼوال وایې، په محلي بازارونو کې د ځایي ونو مېوو ځای بهرنیو مېوو نیولی دی.
د بدخشان د بهارک ولسوالۍ دوه بڼوال احمدنوید او رحیم نوري وایې، د بهارک ولسوالۍ رخش مشهورو مڼو چې پخوا یې ښه بازار لرلو؛ اوس خپل ځای بهرنیو مڼو ته پرېښې دی.
دوی اندېښنه ښيي، چې په بهارک کې ډېر کروندګرو د مڼو د رخش بوټو پرځای زراعتي او بهرنۍ ونو کښت پیل کړی او دا کار وېره ډېروي چې د رخش ځايي او مشهوره مڼه کمه شي؛ خو دوی په ورته وخت کې ډاډ ورکوي چې د خپلمنځي پرېکړې لهمخې به د رخش ونې نسل بېرته راژوندی کړي.
د بدخشان د بهارک ولسوال محمدعظیم موسوي سلام وطندار ته وویل چې د باغونو نوي حاصلات ټیټ مقاومت لري او د دغو حاصلاتو د ساتنې لهپاره د امکاناتو نهشتوالي بڼوال له ستونزو سره مخ کړيدي.
د ښاغلی موسوي په وینا، د بڼوالو ملاتړ او مېوهیې ونو د ځایې نسلونو د روزنې او سړخونو د لرلو په صورت کې د بهارک ولسوالۍ بڼوال د هېواد شمال حوزې ته هم مڼې رسولی شي.
په ورته وخت کې د بدخشان د کرنی رییس محمدعلم عالمي د برېښنا د نهشتوالي له امله د باغونو د حاصلاتو ساتنه ستونزمنه ګڼي.
د ښاغلي عالمي په وینا، د باغونو نوي ډولونه د ناروغیو او د اوبو او هوا پر وړاندې کمروزی مقاومت لري او دوی د پخوانیو مېوو احیا کولو لهپاره ـ چې ښه کیفیت يې لرلو ـ لاس پهکار شويدي.
د بدخشان د کرنې رییس زیاتوي، ادارې يې په ټولو ولسوالیو کې داسې ځایونه جوړ کړي چې د مېوو ځایې او پخوانی نسل وساتي. دی ډاډ ورکوي، نور پلاټونه هم جوړوي چې د مېوو نسلونه په کې وپالي.
د بدخشان د کرنې ریاست مسوولان وايي چې یادې ادارې د قوریې جوړولو ترڅنګ د مېوو د نسلونو ساتنې لهپاره بڼوالو او کروندګرو ته امر کړی چې د ونو دغه نسل ژوندي ساتلو او ترویج په برخه کې ناغېړي ونهکړي.
