له افغان طالبانو سره د اوربند په تړاو د ولسمشر محمداشرف غني له ویډیويي پیغام خپرېدو دوې ورځې وروسته دې ډلې د یوې خبرپاڼې په خپرولو سره د افغان حکومت غوښتنې ته مثبت ځواب ورکړ او وییې ویل، د دوی د ډلې جنګیالي به یوازې د اختر په درېیوو ورځو کې په افغان امنیتي ځواکونو بریدونه نهکوي؛ خو د بهرنیو ځواکونو پر وړاندې به یې بریدونه روان وي.
په ورته وخت کې افغان ولسمشرمحمداشرف غني پهخپلې فېسبوکپاڼې د طالبانو د دې اوربند هرکلی کړی او لیکلي یې دي: «موږ نه يوازې د دې بلکې د هر هغه اقدام چې د وينې د بهېدو مخنيوی کوي، هر کلی کوو.»
د طالبانو د خپرپاڼې له خپرېدو څو ساعته وروسته د ولسمشرۍ ماڼۍ ویاند محمد هارون چخانسوري کابل کې یوې خبري غونډې ته وویل، افغان حکومت د سولې په تړاو هر ډول اقدام په نیک فعال حسابوي او د طالبانو له درې ورځني اوربند هم هرکلی کوي.
د ښاغلي چخانسوري په وینا، هیله لري طالبان هم د دې اوربند په عملي کولو کې ژمن ووسي.
که څه هم یو شمېر پوځي شنونکي د درې ورځني اوربند لهپاره د طالبانو مثبت ځواب نیک کار ګڼي؛ خو وايي، طالبان د درې ورځني اوربند په اعلانولو سره هڅه کوي د خلکو لیدلوري ته بدلون ورکړي چې حالات د ځان په ګټه راوڅرخوي.
د کورنیو چارو وزارت پخواني معین میرزا محمد یارمند او پوځي شنونکی جاوید کوهستاني وايي، طالبان څو ډلې لري او امنیتي بنسټونه باید د اوربند د ژمنې ښکار نهشي.
لهدې سره د ولسي جرګې یو شمېر غړیو هم د طالبانو له دریځ او له افغان حکومت سره له څو ورځني اوربند خوښي څرګنده کړې.
افغان ولسمشر محمد اشرف غني د تېرې اونۍ پنجشنبې په ورځ یوه ویډیويي پیغام کې پهخپله د ۹ ورځني اوربند له اعلانولو سره سم له طالبانو د اوربند غوښتنه وکړه.
ښاغلي غني دغه ویډیويي پیغام کې امنیتي او دفاعي ځواکونو ته سپارښتنه وکړه چې د اوربند په ترڅ کې په افغان وسلهوالو طالبانو خپل هر ډول عملیات ودروي.
