کونی کیچه تورکیه نینگ افغانستان شمالی ولایتلریده بلخدهگی سیاسی وکالتخانهسی بلخ ولایتی حاکمیتیگه مکتوب یوللب تورکیه دولتینی افغانستانده فعالیت آلیب بارهدیگن فتحالله گولن گه علاقه دار مکتبلرنی حمایت ایتمسلیگی بارهسیده یازگن. اوشبو مکتوبده بلخ حاکمیتیدن بو ولایتده افغان – ترک لیسهلری نامیده فعالیت آلیب بارهدیگن مکتبلر آتینی اوزگرتیب، اوشبو مکتبلرده ترکیه بیراغلرینی قویمسلیگینی سورهگن.
ترکیه دولتی ایلکبار افغانستانده فتحالله گولن گه علاقهلی مکتبلر فعالیتی توختهتیلیشی بارهسیده بلخ ولایتی محلی ادارهسیگه مراجعت قیلگن. افغانستان حکومتی بو توغریده عکسالعمل بیلدیرگنی یوق.
بوندن چمهسی 24 ییل آلدین ایلک مرته افغان – تورک مکتبی جوزجان ولایتی مرکزی شبرغان شهریده تاسیس ایتیلگن ایدی. حاضرگی کونده مملکت بویلب فتحالله گولن حرکتی تامانیدن باشقریلهدیگن مکتبلر سانی 20 گه ییتهدی. اوشبو مکتبلر یاپیلیشی بارهسیدهگی میش – میشلر انچهدن بیری بو مکتبلرده تعلیم آلهدیگن افغان اوقووچیلری تشویشیگه سبب بولماقده. پایتخت کابلده مملکت نینگ بیر نیچته مهم شهرلریده تاسیس ایتیلگن افغان تورک – مکتبلری ده تعلیم صفتی یخشی بولگنلیگی تاکیدلنهدی. بوکونگه قدر یوزلب کیشی افغانلر فرزندلری مذکور مکتبلرنی بیتیرگنلر.
افغانستان ایچکریسیده فتحالله گولن گه علاقهدار اوقوو درگاهلریدن علاوه تسامح نامیدهگی مدنی مرکز گولن نینگ کتابلرینی فارس تیلیدهگی ترجمهلرینی نشر ایتیب افغان کتابخوانلرگه ییتکزیب بیرگن.
تورکیهلیک روحانی فتحالله گولن بیلن تورکیه جمهور رییسی رجب طیب ایردوغان مناسبتلری یامانلشگنی تورکیه دولتینی گولن گه علاقهدار اوقوو یورتلری و تعلیم مرکزلرینی تورکیه دولتی تامانیدن حمایت ایتیلمسلیککه آلیب کیلگن ایدی. بونگه قرهمهی اوشبو مکتبلر تورکیه همده دنیانینگ ایریم مملکتلریده اوز فعالیتلریگه دوام ایتدیرر ایدی. اما آیی تورکیه دولتی قرشی عملگه آشیریلگن ناکام حربی کودتا اردوغان دولتینی فتحالله گولن مرکزلری فعالیتینی بیرین – کیین توختهتیشگه اوندهدی. بیرگینه تورکیه نینگ اوزیده گولنچیلر تامانیدن باشقریلهدیگن کمیده بیر مینگ مکتب و تعلیم مرکزلری یاپیلدی.
تورکیه دولتی فتحالله گولن مکتبلرینی دنیا بویلب یاپیش اوچون سعی و حرکت آلیب باره یاتگنی هیچ کیمگه سر بولمسه کیرهک. تورکیه رسمیلری افغانستانده هم افغان تورک – مکتبلری آتیده فعالیت آلیب بارهدیگن اوقوو درگاهلری تیزده یاپیلیشی ایستهگیده بولگنلیکلرینی بیکیتمهیدیلر. یقینده بو توغریده تورکیه دولتی نینگ بلخ ولایتیدهگی سیاسی نمایندهلیگی نینگ بلخ ولایتی همده تشقی ایشلر وزیرلیگی نینگ مذکور ولایتدهگی نمایندهلیگیگه یازگن مکتوبی بو نرسهنی تصدیقلهیدی.
هر حالده رسمی انقرهنی فتحالله گولن تعلیم درگاهلری فعالیتینی افغانستانده یاپیش اوچون سعی و حرکتی توخته مهیدی. یقین کیلهجکده تورکیه رسمی کابلگه اوشبو مکتبلر فعالیتینی یاپیش و یا بو مکتبلر ادارهسینی فتحالله گولن تشکیلاتیدن آلیش بارهسیدهگی باسیملری کوچهییشی ممکن.
رسمی کابل بو مساله گه قندهی یانده شهدی؟
معلوم که تورکیه دولتی افغانستان نینگ اساسی حامیلریدن بیری. 2002 ییلدن بیری تورکیه حربیلری آیساف و ناتو ماموریتی چارچوبهسیده افغانستانده خذمت قیلیب کیلماقده. بوکونگه قدر یوزلب کیشی افغان حربیلر تورکیهده حربی تیارگرلیکدن اوتکزییلیب افغانستانگه قیتگنلر. شونینگدیک هر ییلی قطار محصللر تورکیه یونیورستیتلریده قبول قیلینه دیلر. عین حالده تورکیه افغانستان خلقیگه ساغلیقنی سقلش، معارف، زراعت و عیاللر ظرفیتلرینی آشیریش کبی ساحهلرده هر تامانلمه یاردم کورستیب کیلماقده.
تورکیه افغانستان دوستلیگی نینگ اوزاق اوتمیشگه باریب تقیلیشی همده سونگی ییللرده تورکیه نینگ افغانستان دولتی و اهالیسیگه کورستیب کیلهدیگن کومکلرینی نظرگه توتگن حالده افغانستان دولتی رسمی انقرهنینگ فتحالله گولن بیلن علاقهدار هرقندهی مرکزنی یاپیشی بارهسیدهگی ایستگینی رد قیلیشی منطقی کورینمهیدی. اما بو آرهده افغان – تورک مکتبلرینی مملکت اهالیسی فرزندلریگه یخشی بیر شکلده تعلیم بیریب کیلگنی هم دقتگه سزاوار مسئله سنلهدی. افغانستان دولتی تورکیه ایستگی اساسیده اوشبو مکتبلرنی یاپیشی بارهسیده قرار قبول قیلمسدن آلدین، اوشبو مکتبلر موقعینی مملکت معارفیدن بوشه تیلمسلیگی خصوصیده ضروری چارهلر کوریشی کیرهک.
تورکیه دولتی نینگ بلخدهگی سیاسی وکلاتخانهسی اوزی نینگ بلخ ولایتیگه جونتگن مکتوبیده افغان – تورک مکتبلری آتینی اوزگرتیریب اوشبو مکتبلرده تورکیه بیراغینی تیکله مسلیگینی سورهگن. حکومت بو بارهده عیناً شو ایشنی عملگه آشیریش بیلن بیرگه بو مکتبلر آتینی اوزگرتیریب او ییرلرده تعلیم و اوقوو جریانینی دوام ایتدیریشی لازم. بو بیلن بیرگه تورکیه دولتینی مذکور مکتبلرده تعلیم سویهسی توشمسلیگی اوچون تورکیه دولتی حمایتینی بیر شکلده جلب ایتیشی هم مهم. مسئلهنی باشقه تامانی هم بار. او هم بولسه افغان تورک مکتبلرینی تورکیه دولتی نینگ حمایتی و نظارتی آستیده معین شرطلر بیلن خصوصی بولیمگه تاپشیریشی هم ممکن.
