توتاپ لایحهسی سالنگلر یولیدن اوتکزیلیشیگه قرشی ایرته (دوشنبه) کابل شهریده ییریک اعتراض اوتکزیلیشی کوتیله یاتگن بیر پیت ده، ملی حزبلر کینگشینینگ مسووللری و جهادیلر بوگون (یکشنبه) کابلده بیر خبری ییغین اوتکزیب، اعتراضچیلردن بو ایشدن قول کوتاریشنی سورهگنلر.
مذکور کینگش سیاسی کمیتهسینینگ اعضاسی همده سوزلاوچیسی سیدحامد گیلانی، حاضرگی شرایطده یول یوریب بوندهی اعتراض اوتکزیش مملکت ملی منفعتیگه ایمس دیگن.
او، بو قبیل ناراضیلیک نمایشلرنینگ یامان پیامی بولیشی هم احتمالدن ییراق ایمس لیگینی بیلدیرگن. گیلانی، بوندهی فرصتلردن افغانستان خلقینینگ دشمنلری کوپراق فایدهلنهدی دیگن.
جناب گیلانی، ایکّی کوندن بیری حکومت و اعتراضچیلر ارا واسطهچیلیک قیلیشگه باشلهگن لیگینی تیلگه آلگن. او، توتاپ معماسی کیلیشو یولی بیلن حل ایتیلیشینی تکلیف قیلگن.
ترکمنستاندن افغانستانگه آلیب کیلینه دیگن 500 میگاوات برق لایحهسی حکومت تامانیدن سالنگلر یولیدن اوتکزیلیشی اعلان ایتیلگندن کیین ییریک اعتراضلرگه سبب بولدی.
.JPG)
اما، مملکت مرکزی ولایتلرینینگ اهالیسی حکومت تامانیدن کمسیتیلگن لیکلرینی ادعا قیلگنلر. فیشنر شرکتی آلدین اوتکزگن تیکشروویده مذکور لایحه سالنگلردن کوره بامیان یولی بیلن اوتکزیلشی مقصدگه موافق دیگن ایدی.
مرکزی حکومت اعتراضچیلرگه جواباً، توتاپ لایحهسی تطبیق ایتلیشی اوچون سالنگلر یولی آز خرجت کوتاریشی همده بو یول بامیانگه قرهگنده جوده قیسقه ایکن لیگینی ایتگن.
500 کیلوات برق لایحهسی سالنگلر یولی بیلن اوتکزیلیشی مرکزی حکومت تامانیدن اعلان ایتیلگن لیگیدن بیری اوتکزیلگن ناراضیلیک نمایشلر کون ساین خواطرلی توس آلماقده.
شونینگدیک بو مساله باعث ملی بیرلیک حکومتی ایچیده هم بعضی ایرمهچیلیکلرنی پیدا قیلگن. عین حالده، حکومت نینگ عملدهلی بیر قنچه یوقاری مرتبهلی ملازملری، ایستکلری حکومت تامانیدن انابتگه آلینمهگن تقدیرده، حکومتدن چیتلهنیشلری بارهسیده آگاهلنتیریگنلر.
