د افغانستان روڼتیا څار ادارې رییس سید اکرام افضلي په یوې خبري غونډه کې وویل، چې افغانستان سږکال د بودیجې روڼوالي په نړیوالو ځانګړتیاو کې پاتې راغلی دی.
د بودیجې له پاره د نړیوال مشارکت سازمان (International Budget Partnership) د راپور پر بنسټ د افغانستان حکومت امتیاز د بودیجې رڼوالي اعتبار په برخه کې سږکال د تېر کال په پرتله له ۵۹ سلنې څخه ۴۲ سلنې ته را ټیټ شوی دی.
افضلي د سه شنبې په ورځ د (سپټمبر په ۲۹ مه) وویل، افغانستان له ۲۰۰۸ زېږدیز کال څخه تر ۲۰۱۲ زېږدیز کال پورې د بودیجې د رڼوالي په برخه کې ښه پرمختګ درلود او په روان کال کې د باور دغه بهیر مخ په ځوړ روان دی.
د روڼتیا څار ادارې رییس وايي، چې که سیاسي اراده موجوده وي، نو د بودیجې رڼوالي بهیر سم پلي کېدی شي.
د افضلي پر وینا، د هېوادونو د بودیجې د تطبیق او څار په برخه کې د اسنادو او له یو لړ ټاکل شویو طرزالعملونو څخه کار اخیستل شوی دی، چې د همدې تګلارې پر بنسټ هېوادونو ته امتیازونه ورکول شوي دي.
د دغې ادارې مسولین وايي، چې هېوادوالو ته د بودیجې څخه د معلوماتو په برخه کې د راپورونو نه برابرول او خپرول، د څارونکو ادارو ضعف د بېلګې په توګه دڅېړنې عالي اداره او پارلمان هغه بنسټونه یاد کړل، چې د هېواد امتیاز یې راټیټ کړی دی.
دا د بودیجې له پاره د نړیوال مشارکت سازمان ۵ م راپور و، چې د ۱۰۲ هېوادونو بودیجې یې څېړلي دي.
