د میدان وردګو ولایت د جلرېز ولسوال نقیب الله حیدري سلام وطندار راډیو ته وویل، چې نن (جمه د جولای په لومړۍ) سهار سلګونو وسله والو طالبانو د جلرېز ولسوالۍ د امنیتي ځواکونو په خواجه بیس باندې برید کړی دی.
د ده پر وینا، تر اوسه د دواړو لوريو ترمنځ درنه جګړه روانه ده.
ښاغلي حیدري زیاته کړه، وسله وال طالبان د جلرېز ولسوالۍ د سقوط له پاره د میدان وردګو ترڅنګ له زابل، غزني او لوګر ولایتونو څخه د حشر په بڼه راغلي دي.
د جلرېز ولسوال همداراز وویل، دوی تکتیکي شا تګ کړی او یو پوسته یې وسله الو ته پرېښي ده؛ خو وسله والو طالبانو ته یې درنه مرګ ژوبله اړولې ده.
د نوموړي په خبره، له ۱۰ زیات وسله وال یې وژلي او لا هم له مرکز میدان ښاره د تازه دمو کومکي ځواکونو په رسېدو جګړه روانه ده.
پرون ورځ هم دوو ځانمرګو بریدګرو د کابل د پغمان ولسوالۍ حیدرخان قلعې په سیمه کې د میدان وردګو ولایت د پولیسو له اکاډمي د نویو فارغو شویو ځوانانو د موټرو کاروان تر برید لاندې راوست.
د افغانستان د کورنیو چارو وزارت یوه خبرپاڼه کې تایید کړې، چې په دې پېښه کې د پولیسو ۳۰ تنه افسران وژل شوي او شاوخوا ۵۸ نور ټپیان شوي دي.
افغان ولسمشر محمداشرف غني پر پولیسو دا برید غندلی او ویلي یې دي، چې د پولیسو مامورینو د لیږد څرګنوالی به وڅېړل شي.
له ولسمشرۍ ماڼه نه په یوه خپره شوې خبرپانه کې راغلي، چې د پولیسو په لیږد کې د هر ډول بې غورۍ په صورت کې به تعقیبي اقدامات وشي.
په همدې حال کې افغان ولسمشر وايي، چې حکومت یې د پولیسو د وظیفو په برخه کې د یوه عمده بدلون په حال کې دی.
