افغانستان بوییچه ملی خوفسیزلیک کینگشی نینگ دفتری، دولت گه عاید تینچلیک علاقه‌سی بوییچه بیرینچی گروه و طالبان نینگ سیاسی اعضالری و محبوس‌لر کمیسیونی نینگ مسؤوللری آره‌سیده اوتکزیلگن اوچینچی ویدیو کنفرانس دن خبر بیرگن. اوشبو ویدیو کنفرانس اوتگن کون «یکشنبه، 10- حمل» یولگه قوییلگن.
اوتگن کون «یکشنبه، 10- حمل» ملی خوفسیزلیک کینگشی نینگ دفتری تامانیدن نشر قیلینگن خبرنامه‌ده کیلیشیچه، طالبان گروهی خلق ارا قیزیل حاچ تشکیلاتی نینگ حمایه‌سی بیلن کابل گه بیر هیأت یوباریش گه قرار قیلگن. اوشبو خبرنامه اساسیده، دولت طالبان نینگ بو هیأتی‌نی بگرام ده میزبانلیک قیله‌دی و محبوس‌لرنینگ قوییب یوباریش جریانی‌نی دوام بیره‌دی.
شونینگدیک، ایکی تامان نینگ کیلیشووی اساسیده، طالبان نینگ هیأتی افغانستان گه کیلگنیدن سونگ، کوپینچه بحث‌لر یوزمه یوز و تخنیکی شکلده عمل‌گه آشیریله‌دی.
ملی خوفسیزلیک کینگشی دفتری نینگ قماقخانه‌لرده کرونا ویروسی رواجلنیشی توغریسیده بولگن خواطرلر خصوصیده ایتیشیچه، دولت بو توغریده جدی شکلده تدبیر آلگن.
اوتکزیلگن ویدیو کنفرانس‌ده آمریکا ایلچی‌خانه‌سی، قطر تشقی ایشلر وزیرلیگی و خلق ارا قیزیل حاچ تشکیلاتی نینگ نماینده‌لری هم اشتراک قیلیشگن.
ملی خوفسیزلیک کینگشی نینگ خبرنامه‌سیده طالبان گروهی نینگ هیأتی قچان کابل گه سفر قیلیشی توغریسیده هیچ نرسه دییلمه‌گن.
دولت گه عاید تینچلیک علاقه‌سی بوییچه بیرینچی گروه طالبان بیلن اوتگن هفته 3- و 6- حمل‌ده ایکی مرته ویدیو کنفرانس اوتکزگن ایدی.
دولت و طالبان آره‌سیده اوتکزیلگن ایکینچی ویدیو کنفرانس‌ده طالبان گروهی نینگ هیأتی کابل گه سفر قیلیشی توغریسیده کیلیشیلگن. اوشبو هیأت اوتگن جمعه ده کابل گه کیلیشی خصوصیده قرار قیلینگن ایدی، بیراق طالبان گروهی بو سفر تخنیکی قیین‌چیلیک باعث، توخته‌تیلگنینی ایتگن.
طالبان گروهی نینگ کابل گه سفر قیله‌دیگن هیأتی نینگ 10 اعضاسی بار و بو هیأت مولوی ضیاالدین تامانیدن ییتکچیلیک قیلینه‌دی.
افغانستان حکومتی نینگ قماقخانه‌لریدن طالبان نینگ محبوس‌لرینی قوییب یوباریش جریانی ایرته «سه‌شنبه، 12- حمل» دن رسمی شکلده باشله‌نیشی توغریسیده قرار قیلینگن. بیرینچی باسقیچ ده طالبان نینگ 100 محبوسی قماقخانه‌لردن قوییب یوباریله‌دی.
افغانستان حکومتی نینگ ایتیشیچه، بو محبوس‌لر تیزیم شکلده و ضمانت اساسیده، قوییب یوباریله‌دی.
