د پاکستان د بهرنيو اړيکو او ملي امنيت سلاکار سرتاج عزیز ویلي، چې د حقاني شبکه يو ماته شوې ډله ده او دغه شبکه نور په افغانستان کې د ترهګریزو فعاليتونو د ترسره کولو وړتيا نه لري.
د نوموړي په وينا، چې د حقاني ترهګره ډله د شمالي وزيرستان د عملياتو په پايله کې په بشپړه توګه له منځه تللې او د هغه په خبره پاکستان به نور اجازه ور نه کړي، چې له خاورې يې د نورو هېوادونو پر ضد کار واخیستل شي.
دا په داسې حال کې ده، چې د افغانستان د ملي امنيت لوی ریاست تېره ورځ په کابل ښار کې د حقاني شبکې پورې اړوند یو ۳۰ کسیزه ډله ونيوه، چې غوښتل يې په بېلابېلو سيمو کې ۲۶ بريدونه وکړي.
اخوا بیا د امريکا د بهرنيو چارو وزیر جان کري په دوه ورځني سفر پاکستان ته تللی او هلته يې د پاکستاني مقاماتو سره د خبرو ترڅنګ ويلي، چې د افغان او پاکستاني طالبانو، لشکر طیبه او حقاني شبکې د فعاليتونو دوام د سيمې هېوادونو او ان د امريکا متحده ایالاتو د امنيت له پاره مستقيم ګواښ دی.
جان کري زیاته کړې، چې په پاکستان کې د ترهګریزو شبکو پر وړاندې عمليات کافي نه دي.
له بل لوري افغان حکومت هم د پاکستان د ملي امنیت سلاکار د دغو څرګندونو په اړه د شک په سترګه ګوري او وايي، چې د ترهګریزو فعاليتونو او د تروریزم د ځالو له منځه وړلو له پاره پاکستان په خپله خاوره کې جدي عمليات نه کوي او د حقاني شبکې د له منځه وړلو له پاره یې د دوی اقدامات کافي نه دي.
د ولسمشر د ویاند مرستیال سېد ظفر هاشمي رسنيو ته ویلي، چې پاکستان اوس هم د ترهګرو ملاتړ کوي.
د سياسي چارو کارپوه او د پوهنتون استاد عبدالقیوم سجادي سلام وطندار ته وویل، چې افغانستان اوس هم د پاکستان پر وړاندې ثابت سياست نه لري او تل يې غبرګوني سياست څخه کار اخیستی.
د هغه په خبره افغانستان تر اوسه د پاکستان پر وړاندې ابتکاري او فعال سیاست څخه ډېره کمه استفاده کړې.
د سجادي په وينا، لومړی باید د پاکستان پر وړاندې يو عمومي فکر را منځ ته راشي او بیا يې پر وړاندې مشخصه ستراتيژي جوړه شي.
قيوم سجادي وايي، چې افغان حکومت باید د پاکستان په هکله له روان سياست نه پرهيز وکړي او د امريکا، ناټو او عامه افکارو له لارې پرې فشارونه زیات کړي.
د امريکا متحده ایالاتو د بهرنیو چارو وزارت د ویاند مرستیال مارک تونر بیا وایي، چې د طالبانو او د حقاني شبکې د وژونکو تاوتریخوالیو د بندولو او د دې ګواښونو پر وړاندې دوه چندې مبارزې ته اړتیا ده.
له بل لوري د سپینې ماڼۍ ویاند جاش ارنست، هم ورته څرگندونې کړې او ویلي یې دي، چې د بارک اوباما د ملي امینت سلاکارې سوزن رایس، پاکستان ته د خپل وروستني سفر په ترڅ کې د ترهگرۍ پر وړاندې د پاکستان د جدي مبارزې غوښتنه کړې ده.
هغې پاکستان ته په زغرده ویلي وو، چې دا د امريکا متحده ایالاتو له پاره په هیڅ صورت د منلو وړ نه دي، چې په افغانستان کې ترهګریز بريدونه دې په پاکستان کې پلان شي.
یاده دې وي، چې د امريکا له لوري داسې شکونه هم شته، چې پاکستان د حقاني او نورو تروریستي شبکو پر ضد د (ضرب عضب) په نوم پوځي عملياتو کې هم د حقاني شبکې پر وړاندې جدي عکس العمل نه دی ښودلی.
امريکا وايي، چې هغه مهال پاکستاني پوځيان د حقاني شبکې پر ضد د پوځي عملياتو له ترسره کولو ډډه کړې.
د سیاسي چارو بل شنونکی محب الله شریف وايي، د افغان حکومت تېر ۱۳ کلنې دورې ته په کتو سره افغانستان د پاکستان پروړاندې د باثباته سیاست درلودونکی نه وو او نه يې د دغه هېواد پر وړاندې داسې پالیسې در لوده، چې تل پاتې وي.
ده زیاته کړه، دا په دې پورې اړه لري، چې د افغانستان لومړیتوبونو او ګټو له پاره او تعیین له پاره څوک ټاکل شوي دي او د دې پر بنسټ باندې د بهرني سیاست په لومړۍ کرښه کې کليدي اشخاص څوک دي او په دې پوه شي، چې د افغانانو او پاکستانیانو غوښتنې څه دي.
د امريکا شک هغه مهال په یقین بدل شوی، چې شاوخوا یوه میاشت وړاندې د کابل پر شاه شهيد سيمه کې تروریستي برید وشو او امريکا يې پړه د حقاني شبکې پر غاړه واچوه.
پټه دې پاتې نه وي، چې د حقاني شبکه د امريکا متحده ایالاتو ته له خوا په تور لیست کې هم شامله شوې، چې د امریکا د وسله وال پوځ پخواني لوی درستیز مایک مولن هم دغه شبکه د اسلام اباد د استخباراتي ادارې اجرایوي مټ گڼلی و.
