افغان سوله، د هند او پاکستان د کړکېچ قرباني

په افغانستان کې د پاکستان سفیر زاهد نصرالله نن په یوې خبري غونډې کې وویل، که هند په کشمیر کې د وروستي برید په ځواب کې د اسلام‌اباد پر وړاندې جدي غبرګون وښيي، د افغان سولې خبرې اترې به زیانمنې شي.

دا څرګندونې تر هغې وروسته کېږي چې څلور ورځې وړاندې په کشمیر کې د یوه ځانمرګي برید له کبله ۴۴ هندي ځواکونه ووژل شول. د دغه برید مسوولیت پاکستان مېشتې جیش‌المحمد ډلې پر غاړه واخیست.

دا په داسې حال کې ده چې د طالبانو استازي په نږدې راتلونکې کې یو ځل بیا د افغان سولې لپاره د امریکا له ځانګړي استازي سره په دوحه کې وګوري.

په همدې حال کې د پاکستان لومړي وزیر عمران خان هم نن ګواښ وکړ، که هند د دغه برید په ځواب کې په نظامي اقداماتو لاس پورې کړي، پاکستان به هم ورته ځواب ورکړي.

پاکستان په دې برید کې خپل هر ډول لاس لرل ردوي او په یوه لیک کې یې له ملګرو ملتونو غوښتي چې د حل لپاره یې لای په‌کار شي.

د هند لومړي وزیر نرېندرا مودي هم د دغه برید په غبرګون کې ویلي، خپلو ځواکونو ته یې خلاص ورکړی چې د یاد برید لپاره یو ځواکمن ځواب پلان کړي.