سند؛ ولسمشر غني د ښار جوړونې وزارت سرپرست لويې څارنوالۍ ته معرفي کړ

ولسمشر محمد اشرف غني په خپل تازه فرمان کې لويې څارنوالۍ ته امر کړی چې د ځمکو او  ښار جوړونې وزارت سرپرست جواد پیکار د ولسمشر د فرمان پر خلاف د یو شمېر کسانو پر دندو د ګمارلو او له هېواده بهر د جایدادونو او اپارتمانونو د اخیستو په تور تر څېړنې  لاندې ونیسي.

کوم اسناد چې سلام وطندار ته رسېدلي د لوېې څارنوالۍ د مرستیال نور حبیب جلال لاسلیک هم پرې لیدل کېږي او په دې اسنادو کې د ولسمشر غني له لارښوونې وروسته، لويې څارنوالۍ د ځمکو او ښارجوړونې  سرپرست وزير له اداري فساد او جرمونو سره د مبارزې په چارو کې د لويې څارنوالۍ مرستیالیت ته معرفي کړی دی.

په يادو اسناد کې همداراز راغلي چې ولسمشر غني له اړوندو مراجعو غوښتنه کړې چې د ځمکو او ښار جوړونې سرپرست وزير جواد پیکار د څېړنو د بهیر تر بشپړېدو ممنوع الخروج اعلان کړي.

خو د ځمکو او ښار جوړونې وزارت ویاند حشمت الله ناصري وايي، لویې څارنوالۍ د جواد پیکار په اړه بېړنی اقدام کړی دی.

د ناصري په خبره،؛ په پام کې ده چې ولسمشر غني د لويې څارنوالۍ په مکتوب کې د يادو شویو ځینو مواردو په رد سره دوه تازه فرمانونه د ځینو لوړ رتبه چارواکيو د جایدادونو د څېړنې په موخه چې د ځمکو او ښارجوړونې سرپرست به هم په کې شامل وي، صادر کړي.

هڅه مو وکړه په راپور کې د ارګ نظر هم ولرو؛ خو د ولسمشرۍ ماڼۍ هېڅ ویاند ځواب ویلو ته حاضر نه شو.

د يادولو ده چې د ټولنیزو شبکو ځینو کاروونکيو د جواد پیکار او ولسمشر غني ترمنځ د اختلافاتو او نه جوړښت په اړه لیکنې کړې دي.