یوې باخبره سرچینې سلاموطندار ته ویلي چې امنیتي ځواکونو د «دولتي بنسټونو د نیولو» مخنیوي پر طرحې کار پیل کړی دی. د سرچینې په وینا، یاده طرحه به له بشپړېدو وروسته محمداشرف غني ته وړاندې شي.
سرچینه چې نه غواړي نوم یې یاد شي زیاتوي چې دغه طرحه به د جزا کوډ د ۲۳۸، ۲۳۹، ۲۵۸، ۴۰۳ او ۴۵۳ مادو پر بنسټ جوړه شي. نو د محمداشرف غني له لوري د دغې طرحې تر تایید وروسته به امنیتي ځواکونه د «ملي خیانت په نوم د ۲۳۸مې مادې پر بنسټ، د ۲۵۸مې مادې پر بنسټ د دولتي بنسټونو د نیولو اقدام، د ۴۰۳مې مادې پر بنسټ د عامه خدمتونو له موظف نه ناوړه ګټه اخیستنه او د جزا کوډ د ۴۵۳مې مادې پر بنسټ د په عامه دندو کې د لاسوهنې» مخنیوي لپاره لاس پهکار شي.
سرچینه که څه هم په دې اړه ډېر جزیات نه ورکوي، خو وايي چې یاده طرحه به نن ناوخته د محمداشرف غني مېز ته ورسېږي.
داسې ښکاري چې دغه طرحه د ثبات او همپالنې ټیم پلویانو له لوري د سرپل ولایت د ودانۍ نیولو، د جوزجان ولایت د وادنۍ کلابندېدو او د بغلان ولایت د ودانۍ نیولو لپاره هڅو اشاره لري.
سلاموطندار هڅه وکړه چې په دې اړه د ولسمشرۍ ماڼۍ نظر واخلي، خو بېپایلې وه. خو د ثبات او همپالنې ټیم غړی فضلاحمد معنوي وايي، هیله لري چې دا «تاریخي تېروتنه» عملي نه شي. هغه خبرداری ورکوي چې «نښتې به د امنیتي ځواکونو په منځ کې د یوې نه جبرانېدونکې ګډوډۍ» لامل شي. معنوي وايي، د تاوتریخوالي لپاره کوم پلان نه لري، خو که د ثبات او همپالنې پر وړاندې اقدام وشي، امنیتي ځواکونه به «له کورني عکسالعمل» سره مخ شي.
بلهخوا امنیتي ځواکونو په یوه ګډه اعلامیه کې له معترضانو غوښتي چې د خپلو غونډو او اعتراضونو پر مهال «د عامه ملکیتونو، ټولګټو بنسټونو او د خلکو عزت او حیثیت» ته له زیان رسولو ډډه وکړي. په اعلامیه کې لیکل شوي چې امنیتي ځواکونه هېڅ ډلې ته د عامه نظم د ګډوډۍ اجازه نه ورکوي.
د اعلامیې په یوه برخه کې لیکل شوي چې «له معترضانو په جدي توګه غوښتل کېږي چې د خپلو اعتراضونو پر مهال وسله ونه ګرځوي او د عامه نظم د ګډوډولو لامل نه شي، کهنه د سرغړوونکیو سره به د قانون پر بنسټ جدي چلند وشي.»
دا په داسې حال کې ده چې عبدالرشید دوستم له دې وړاندې خبرداری ورکړی و چې د نظامي اقدام پر وړاندې به ورته اقدام وکړي. د ولسمشري ټاکنو د وروستۍ پایلې له اعلان وروسته، عبدالله عبدالله د عبدالرشید دوستم یو نږدې کس د جوزجان د والي په توګه ونوموه او بلهخوا محمداشرف غني د یوه فرمان په صادرولو سره د لوړې مراسمو جوړولو لپاره یوه کمېټه وګومارله. د رسنیو د راپورونو له مخې، د محمداشرف غني د لوړې مراسم به د روانې اوونۍ د پنجشنبې په ورځ جوړ شي.
