د ګلبدین حکمتیار پر مشرۍ د حزب اسلامي ویاند وايي، چې د روانې اونۍ په اوږدو کې به د دوی د حزب یو پلاوی د سولې خبرو اترو د دوام له پاره کابل ته راشي او له افغان چارواکیو سره به د دواړو لوریو ترمنځ سولې ته د رسېدو په اړه خبرې وکړي.
په پاکستان کې د دې ګوند ویاند غیرت بهیر سلام وطندار ته وویل، چې د سولې د خبرو په تړاو به د امین کریم پر مشرۍ د دې حزب یو څلور کسیز پلاوی د روانې اونۍ په اوږدو کې کابل ته سفر وکړي او د سولې د خبرو د دوام په اړه به بحث وکړي.
دوی د سولې ته د مقابل لوري د لېوالتیا په اړه په تمه دي.
د بهیر پر وینا، دوی هیله من دي، چې د سولې په اړه دا ځلي خبرې یوې مثبتې او مطلوبې نتیجې ته ورسېږي او تمه لري، چې د دواړو لوریو ترمنځ په کېدونکي تړون کې ګونګوالی نه وي.
د ده په خبره، د ناسمو تعبیرونو نه د خلاصون له پاره باید دا موافقه ابرومنده، عادلانه او په انصاف ولاړه وي.
د افغانستان د سولې عالي شورا چارواکي هم تاییدوي، چې حزب اسلامي بیا ځلي خبرو ته زړه ښه کړی دی.
د دې شورا مرستیال عطا الرحمان سلیم وايي، چې ښايي د حزب اسلامي پلاوی په راتلونکیو دوو ورځو کې کابل ته راشي. سلیم تمه ښيي، چې د سولې په تړاو به د حزب اسلامي نوي وړاندیزونه څه وي.
په ورته وخت کې د سیاسي چارو شنونکی محمد یونس فکور وايي، چې د ګلبدین حکمتیار پر مشرۍ حزب اسلامي ګوند په حکومت کې دننه هم مخالفان لري او هم پلویان، خو پر وینا یې، د حزب اسلامي مخالفان هڅه کوي، چې د حزب او افغان حکومت ترمنځ خبرې اترې ناکامې کړي. د ده په باور، په خپله د حکمتیار له هڅو داسې معلومېږي، چې سولې ته ډېر لېوال دی.
د ده په خبره، ښايي د ولسمشر محمد اشرف غني او ډاکټر عبدالله هغه پلویان چې څوکۍ نه دې ور رسېدلي؛ د ده په راتګ د عامو ذهنونو په خرابولو سره نوي اختلافات راپیدا کړي.
له دې مخکې هم د حکمتیار پر مشرۍ د حزب اسلامي ګوند او افغان حکومت ترمنځ خبرې شوې وې او د خبرو په پایله کې حکمتیار ته یو تړون هم وړاندې شوی و، خو په تړون کې د ځېنو وړاندیزونو پر سر نه جوړجاړي دغه پروسه ځنډولې وه، چې له څه مودې وروسته یو ځل بیا په دې اړه د نوي شین څراغ څرک لیدل شوی دی.
