د افغانستان ولسمشرۍ ماڼۍ له لوري په خپره شوې خبرپاڼې کې راغلي، چې نن سهار د (می ۸مه) پر هغو ترهګرو د اعدام حکم تطبیق شو، چې په ترهګریزو بریدونو، چاودنو او د خلکو په وژنو کې يې لاس درلود.
خبرپاڼه وايي، چې افغان ولسمشر محمد اشرف غني د افغانستان اساسي قانون، د جزا قانون، د اسلام مقدس دین، د دولت نورو الزاماتو او د ترهګریزو بریدونو د قربانیانو د کورنيو د مکررو غوښتنو پر بنسټ په ۶ تنو د اعدام حکم توشیح کړی دی.
ولسمشرۍ ماڼۍ لیکي، چې اعدام شوي کسان د "سنګینو" جرمونو مرتکبان وو او د غو مجرمانو ولسي خلک وژلي وو او همدا ډول یې عامه امنیت خراب کړی و.
په خبرپاڼه کې راغلي، چې له پوره دقت، د منصفانه او عادلانه پروسې له بشپړېدلو او د بشري حقونو د الزامیت په پام کې نیولو سره دغه حکم د ولسمشر له خوا توشیح شوی دی.
خبرپاڼه وړاندې لیکي، چې پر دغو شپږو تنو، چې د جلا جلا قضيو په تور نيول شوي؛ نن یک شنبه د (می ۸مه) د عدلي او قضايي مراجعو له خوا د هېواد د قوانینو پر سم دغه حکم اجرا شو.
د خبرپاڼې په پای کې راغلي، چې د افغانستان اسلامي جمهوري دولت او ولسمشر محمد اشرف غني د عدالت پلي کولو او مجرمانو ته د سزا په ورکولو ژمن دی.
ارګ لیکلي، افغان دولت به هغه کسان د خپلو اعمالو په سزا ورسوي، چې بې ګناه خلک وژني او د ټولنې امنیت له خطر سره مخ کوي.
داسې هم ویل شوي، چې په اعدام شویو کسانو کې د ملي امنیت پخواني لوړ پوړي چارواکي ډاکټر عبدالله لغماني او د برهان الدین رباني د وژلو په تور نيول شوي کسان هم شامل دي او دغه کسان په څرخي پله زندان کې اعدام شوي.
وروسته له هغه، چې څو ورځې مخکې په کابل کې د لوړ پوړیو چارواکیو د ساتنې پر مرکز برید وشو؛ نو د قربانیانو کورنيو له افغان حکومت څخه د عاملانو او په بند کې د پرتو بندیانو د اعدامولو غوښتنه وکړه.
