ولسمشرۍ ماڼۍ د یوې خبرپاڼې په خپرولو سره ویلي چې د افغان سولې په اړه د امریکا د بهرنیو چارو وزارت ځانګړي استازي زلمي خلیلزاد تېر ماښام د افغانستان له ولسمشر محمداشرف غني او د حکومت له نورو غړیو سره د دوحې غونډې راپور شریک کړ.
د خبرپاڼې له مخې، خلیلزاد ویلي، په یادې غونډې کې د افغانستان د نظام جوړښت او د لنډمهالي حکومت جوړېدو په اړه هېڅ خبرې نهدي شوي او هغه څه چې په رسنیو کې خپاره شوي، ناسم او یوازې شایعه دي.
په خبرپاڼې کې د خلیلزاد له قولي لیکل شوي چې دوی له طالبانو سره یوازې د اوربند په اړه خبرې کړي، خو تراوسه پهدې برخه کې پرمختګ نهدی شوی.
نوموړي له افغانستانه د بهرنیو ځواکونو د وتلو په اړه له طالبانو سره هوکړه رد کړې او ویلي یې دي، پهدې برخه کې هره پرېکړه به له افغان دولت سره د مفصلو خبرو اترو له لارې کېږي.
خلیلزاد ټینګار کړی چې د امریکايي استازیو مسوولیت د افغان حکومت او طالبانو ترمنځ د سولې خبرو اترو لپاره اسانتیاوې برابرول دي چې نوموړی به دې موخې ته د رسېدو لپاره یو ځل بیا د طالبانو له استازیو سره وګوري.
د ارګ د خبرپاڼې له مخې، خلیلزاد ویلي چې په افغانستان کې د تلپاتې سولې راتلو لپاره د حل یوازینۍ لار د بینالافغاني خبرې اترې دي.
