اوتگن کیچه کابل یشاوچی‌لریدن یوزلرچه‌سی طالبان‌نینگ جاغوری، مالستان و ارزگان‌خاص تومنی اوستیگه بولگن هجومی باعث ناراضلیک نمایش اویوشتیرگن‌لر.
اعتراضچی‌لر مذکور تومن‌لرده خوفسیزلیک تأمین ایتیلیشی‌نی سوره‌گنلر.
اعتراضچی‌لر حکومت-حکومت، امنیت-امنیت؛ جاغوری-مالستان، ارزگان-ارزگان شعار بیریب اوزلرینی ارگ‌نینگ ایشیگی گه یتیشتیرگن‌لر.
شونینگ‌دیک یشاوچی‌لردن یوزلرچه‌سی بلخ، بامیان و غزنی ولایت‌لریده طالبان‌نینگ هجومی‌گه قرشیلیک بیلدیریب یوللرگه چیققنلر و حکومت‌دن یشاوچیلرنینگ نجاتی اوچون اقدام قیلیشی نی سوره‌گنلر.
اعتراضچی‌لر مذکور تومن‌لرده هوایی هجوم رخصتی بیریلیشی، تومن‌لرنینگ تازه‌لنیشی، زیان کورگنلرگه تیزیاردم بیریلیشی، یوللرگه خوفسیزلیک پوسته‌لر قوریلیشی، مرکزی منطقه‌لرده دایمی قول‌اردو ایجاد ایتیلیشی و جمهور رئیس بیرگن سوزلرینی عمل گه آشیریلیشی نی سوره‌گنلر.
اعتراضچی‌لرنینگ ایتیشیچه، حکومت اولرنینگ ایستگی گه ایجابی جواب بیرمه‌گن صورتده، اعتراض‌لرینی کینگه‌یتره‌دیلر.
یشاوچیلرنینگ اعتراضی یانیده کابل بیلیم یورتی‌نینگ اوقوچی‌لری درس تعطیل‌لیگی دن فایده‌لنیب، اعتراضچی‌لر صفیده قوشیلگن‌لر.
عینحالده، ملی حربی باش قومندانی محمدشریف یفتلینینگ بوگون "دوشنبه" بیر خبری ییغین آرقهلی ایتیشیچه، هوایی هجوملر باعث قورالی طالبلر مالستان تومنیده مغلوب بولگن و مذکور تومن مرکزدن اوزاقلشگن.
اونینگ ایتیشیچه، اهالیدن دفاع قیلیش اوچون امنیتی و دفاع کوچلرنی محل ده بار و بوگون هم طالبلرگه قرشی هوایی هجوم یولگه قوییلهدی.
ملی حربی باش قومندانی‌گه کوره، ملی خوفسیزلیک و ملی اوردو خاص کوچلریدن بیرقطاری یوقاری تجهیزات بیلن غزنی ولایتینینگ جاغوری تومنیده یوباریلگن.
عینحالده، کابل گارنیزیون قومندانی مرادعلی مرادنینگ ایتیشیچه، مالستان و جاغوری تومنیده قورالی طالبلرگه قرشی تازهلش عملیات یولگه قویلیش اوچون جمهور رئیس غنی بویروغ بیرگن.
گارنیزیون باشلیغینینگ ایتیشیچه، حکومت اهالی ایستگی گه دقت قیلمهگن صورتده، مقامیدن استعفا قیلهدی.
مراد گه کوره، افغانستان جمهور باشلیغی ناراضچیلر بیلن میدیالر آرقهلی مستقیم صورتده صحبت قیلیش قرارینی آلگن.
قورالی طالبلر نیچه هفته آلدین ارزگان‌خاص تومنیده هجوم قیلگن ایدی و رسمی رقملرگه کوره، آتیشمه جریانیده تینچاهالی دن 63 تهسی هلاک و یرهلنگن.
طالبلرنینگ جاغوری تومنیدهگی هجوملری 6 کون آلدین باشلهندی و خوفسیزلیک کوچلر و قورالی طالبلر آرهسیده یوزبیرگن آتیشمه نتیجهسیده 15 تینچاهالی هلاک ایتیلگن.
