یقینده افغانستاننینگ مزارشریف شهریده چاپ ایتیلگن "افغانستانده اوزبیک ملی غایهسی و تیل تعلیمی دستوری" کتابی دقتیمیزنی اوزیگه تارتدی. 86 بیتدن عبارت بولگن اوشبو کتاب مؤلفی اوزبیکستانلیک تاریخ شناس عالم شهرت برلاس بولهدی. اوزبیکستانلیک یازووچینینگ افغانستان اوزبیکلری ملی و مدنی حیاتی، تیل دستوری حقیده یازگن اوشبو کتابی بیر نیچه جهتدن بیز اوچون اهمیتگه ایگه.
اولا، اوزبیکستانلیک عالملر و یازووچیلر تامانیدن افغانستانلیک اوزبیکلر حیاتینینگ ایریم قیررهلری اینیقسه مدنی تورموشی کبی مسالهلریگه بغیشلب یازیلگن اثرلری کوب ایمس، حتا که یوق درجهسیده. شهرت برلاسنینگ اوشبو اثری، انه شو نقطه نظردن بیز اوچون اهمیتلی سنلهدی.
نصرالله اوغلی شهرت برلاسنی قوشنی اوزبیکستاننینگ افغانستانلیک اوزبیکلرگه قیزیقهدیگن سناقلی یازووچیلریدن بیری دیسک خطا قیلمهیمیز. ایکینچیدن "افغانستانده اوزبیک ملی غایهسی و تیل تعلیمی دستوری" کتابی افغانستان بیلیم یورتلری همده مکتبلریده فعالیت آلیب بارهدیگن اوزبیک تیلی و ادبیاتی بولیملری، استادلری و اوقووچیلری اوچون فایدهلی بیر قوللنمه اثر صفتیده خذمت قیلیشی ممکن.
کتاب ایکی بولیمنی اوز ایچیگه آلهدی، بیرینچی قسمی "افغانستانده اوزبیکلر ملی غایهسی"، ایکینچی بولیم ایسه "افغانستانده اوزبیک تیلی و ادبیاتی تعلیمی دستوری." کتاب گه افغانستانلیک اوزبیک تیلشناس عالم، شاعر و یازووچی استاد سید محمد عالم لبیب تقریظ یازگن.
جناب لبیب تامانیدن یازیلگن تقریظده درواقع اوشبو کتاب هر تامانلمه تنیشتیریلهدی. جناب لبیب بو کتاب حقیده منه بوندهی یازهدی". اوشبو کتاب ایکی بولیمدن عبارت بولیب، بیرینچی بولیمی "افغانستان اوزبیکلر ملی غایهسی" دستوری دیب اته لهدی. بونده "ملی غایه" توشونچهسینی ایضاحلاوچی بیر قطار سیاسی – اجتماعی اصطلاح و اتمه سوزلر و عبارهلر جملهدن انسان و جمعیت، هم جهتلیک و دخلدارلیک، اجتماعی عدالت، ملی مقصد، بخت و ایرکینلیک، ملی ذهنیت و ملی مفکوره و جمعیت کبی توشونچهلرگه تعریف بیریلیب، اولر شرحلنیب کیلهدی…
ایکینچی بولیم ایسه "افغانستانده اوزبیک تیلی و ادبیاتی تعلیم قاعدهلری" دیب اته لهدی. بونده، اوشبو دستورنینگ مقصد و وظیفهلری، مندرجهسی و اوزبیک تیلیگه تیگیشلی بولگن عمومی معیارلر بیلگیلب بیریلگن.
کتاب نینگ بو قسمیده حقلی روشده دنیانینگ برچه اوزبیکلری اوچون اولرنینگ محیطی و لهجوی خصوصیتلرینی اوزیده عکس ایتیرگن حالده، یگانه ادبی تیلی – اوزبیک تیلی – موجود بولیشی اورغولنهدی." شهرت برلاس "افغانستانده اوزبیک ملی غایهسی و تیل تعلیمی دستوری" اثری نینگ کیریش قسمیده کتاب تألیفی ضرورتلری اوستیده توختهلیب، افغانستان و اوزبیکستان خلقلری اورتهسیده صمیمی دوستلیک ینهده چقورراق ایلدیز آتیشینی آورزو قیلهدی.
کتاب مؤلفی، اثرنینگ کیریش قسمی نینگ بیر ییریده منه بولرنی یازگن: "افغانستانده اوزبیک ملی غایهسی و تیل تعلیمی" ناملی دستورلر مجموعی اوزبیک ملتی نینگ تاریخینی، اجتماعی – سیاسی حیاتینی، تیلینی و ادبیاتینی حرمت قیلووچی، آته و بابالری روحیگه و اوز تیلیگه صداقتلی بولیب، همیشه دقت مرکزیده اوشلب تورووچی مخلصلرنینگ توصیهلرینی کوزده توتگن حالده، توزیب چیقیلدی.
اوشبو اثر یرهتیلیشیده، بیزگه روحی کوچ و الهام بغیشلهگن افغانستانلیک و اوزبیکستانلیک دوستلریمیز، کسبداشلریمیز و شاگردلریمیزنینگ قیمتلی توصیهلری، مصلحتلری و معنوی دستکلری اوچون تشکرلریمیزنی بیلدیرهمیز." "افغانستانده اوزبیک ملی غایهسی و تیل تعلیمی دستوری" اثری 2000 تیراژده چیرایلی مقوا بیلن صفتلی قاغازده یاش تشبثکارلریمیزدن حرمتلی خیرمحمد سلجوقی نینگ مالیوی یاردمی اساسیده نشر ایتیلگن.
کتابدهگی بعضی بیر املایی کمچیلیکلر همده کتاب فونتی نینگ بیر آز کیچیکلیگینی نظرگه آلمهسک مذکور قوللنمه اوزبیک تیلی و ادبیاتیگه قیزیقهدیگنلر اوچون مطالعه گه ارزیدیگن اثر حسابلنهدی.
افغانستان اوزبیکلری نینگ کتابگه بولگن احتیاجی، کتاب معنوی بایلیک دیمک دیر. اوزاق اوتمیشلردن بیری مستبد تیزیملر حاکمیتی باسیمی عاقبتیده اوز تیلی و ادبیاتینی رواجلنتیریشگه امکان تاپمهگن افغانستان اوزبیکلرینی حاضرگی کونده کتابگه بولگن احتیاجی کته.
ایریم سببلر اینیقسه مالیوی امکانلر تنقیسلیگی باعث سونگی ییللرده افغانستانلیک اوزبیک یازووچیلر اثرلری چاپدن چیقمهیپتی. بوندهی بیر شرایطده شهرت برلاس اثری نشر ایتیلیب اوزبیک کتاخوانلر اختیاریگه قوییلیشی کته غنیمت سنلهدی.
کیینگی ییللرده اوزبیک تیلیده نشر ایتیلگن بیر قطار اثرلر هیچ قچان مملکت اوزبیکلری نینگ معنوی چنقاقلیگینی برطرف ایته آلمهیدی. بیزنینگ یاشلریمیزنی اوزبیک ادبیاتی نینگ کلاسیک اثرلرینی اوقیشلری لازم.
افسوسکه اوشبو اثرلر مملکت ایچکریسیده بوکونگچه نشر ایتیلمهگن و یا کم نشر ایتیلگن. شونینگدیک افغانستان اوزبیکلری، اوزبیک ادبیاتینینگ زمانی ادبیاتلرینی اوقیش امکانیگه ایگه ایمسلر. بونگه افغانستاندن تشقری حدودلرده حیات کیچیرهدیگن اوزبیک یازووچیلر اثرلری کیریل یا که لاتین الفبالریده نشر ایتیلیشی اساسی سبب ایکنی تاکیدلنهدی.
حاضرگی کونده هم کلاسیک همده زمانوی اوزبیک ادبیات خزینهلری نینگ معلوم قسمینی لاتین یا سیریلیک الفبالریده انترنتده تاپیش ممکن. اوشبو اثرلرنی افغانستانده قوللهنیلهدیگن عرب الفباسیگه اوگیریب کتاب شکلیده چاپ ایتیب، خوانندهلر قولیگه ییتکزیلیشی سوو و هوادیک ضرور.
عکس حالده، اوزاق ییللردن بیری اوزبیک تیلی و ادبیاتیگه عاید اثرلرنی اوقیش امکانیدن چیتده سقلنگن مملکت اوزبیکلری نینگ ادبی چنقاقلیگینی قاندیریش ممکن ایمس.
اصلیده بو ثوابلی ایشنی افغانستان دولتی عملگه آشیریشی کیرهک. افسوسکه دولت بو توغریده مملکت اساسی قانونیده قید ایتیلگن وظیفهسینی بجرمهیپتی. بوندهی بیر وضعیتده، افغانستان اوزبیکلرینی دولت گه قرهب اوتیرمسلیکلری لازم.
اوزبیک یازووچیلری اوز اثرلریدن علاوه اوزبیک ادبیاتی نینگ کلاسیک و زمانوی ادبیاتلرینی افغانستان اوزبیکلری اوچون نشرگه تیارلشلریگه احتیاج سیزیلهدی. بو آرهده بای بدولت اوزبیکلرنی هم اوشبو جریاننی مالیوی جهتدن حمایت ایتیشلری ضرور.
