ولسي جرګې نننۍ غونډې ته د نفوسو د ثبت او احوالو ادارې او د ټاکنو کمېسیون مسوولان د ځواب ویلو لهپاره ورغوښتي وو.
د جرګې یوشمېر غړیو د جعلې پېژندپاڼو له وېشلو اندېښنه څرګنده کړه او ځېنو نورو وویل، په یوشمېر ولایتونو کې یو کس څو پېژندپاڼې اخیستي دي.
د هغوی په وینا، د دغې ستونزې له منځه وړلو لهپاره هېڅ ډول میکانیزم شتون نهلري.
د ولسي جرګې دوه غړي محمد داود کلکانی او محمد حسین فهیمي وايي، پېژندپاڼې په جعلي توګه جوړېږي او په دې اړه لاسوندونه لري.
ورته وخت کې د نفوسو د ثبت او اوحوالو ادارې مشر همایون محتاط وايي، د کاغذي پېژندپاڼو په اساس د ټاکنو ترسره کولو طرحه د ټاکنو کمېسیون له لوري وړاندې شوې چې د نفوسو د ثبت او احوالو اداره له لومړیو ورځو د کاغذي پېژندپاڼو له لارې د ټاکنو ترسره کولو سره موافقه نهوه.
ښاغلی محتاط ټینګار کوي د کاغذي پېژندپاڼو په اساس باید د رڼو ټاکنو ترسره کېدو تمه ونشي.
هغه زیاتوي، د کاغذي پېژندپاڼو په اخیستو کې د درغلیو مخنیوي او د دغو پېښو څېړنه د امنیتي بنسټونو دنده ده چې تراوسه پورې یې په دې اړه هېڅ ډول راپور نه دی ترلاسه کړی.
د ولسي جرګې ځېنې غړي د رایهورکوونکیو د نوملیکنې مرکزونو له تړل کېدو او یوشمېر ولسوالیو ته د ټاکنیزو موادو له نه رسېدو شکایت کوي.
دغهراز د ټاکنو کمېسیون عملیاتي مشر زمری قلمیار وايي، د رایهورکوونکیو د نوملیکنې له ۴زرو او ۴۹۱ مرکزونو ۴۳۳ یې د امنیتي ګواښونو او ۳۰۰ نور د موادو نه رسېدو له امله تړل شوي دي.
د نن ورځې غونډې په پای کې د ولسي جرګې یوشمېر غړیو د ټاکنو کمېسیون مسوولانو ځوابونه غیرموجه وبلل او ټینګار یې وکړ کمېسیون د رایهورکوونکیو د نوملیکنې بهیر ستونزو له منځه وړلو لهپاره هېڅ ډول پروګرام نه لري.
