ولسمشر محمد اشرف غني نن د لوګر ولایت مرکز پلعلم ښار کې د ۲۲۰ میګاواټه په ظرفیت د برېښنا سب سټېشن پرانیست.
مراسمو ته ولسمشر غني وویل د کابل له ارغندې تر پلعلم پورې ۷۲ کیلومتره د برېښنا مزي غځولو کار بشپړ شوی او همدا اوس په رسمي توګه پرانیستل شو.
غني وايي، پر دغه سب سټېشن ۳۶،۳۹ میلیونه امریکایي ډالر لګېدلي دي. زیاته یې کړه چې د برېښنا د یو ولټ بیه به له ۲۵ افغانیو ۶،۲۵ افغانیو ته راښکته شي او ۱۳زره کورنۍ به په برېښنا روښانه شي.
ولسمشر ژمنه وکړه د لوګر امنیت ټينګښت سربېره به دغلته هوايي ډګر او صنعتي پارک ته هم ځانګړی پام کوي.
بلخوا د لوګر والي انورخان اسحاقزي له ولسمشره وغوښتل لوګر ولایت دې له درېیمې دویمې درجې ته پورته او د دغه ولایت امنیت، پوهنې، کرنې او بیارغاونې ته زیات پام واړوي.
د معلوماتو لهمخې د برېښنا له اړخه د افغانستان ۸۰ سلنه اړتیا له وارداتي برېښنا پوره کېږي او دغه هېواد هرکال له خپلو ګاونډيانو ۸۰۰ میګاواټه برېښنا واردوي . یوازې ۲۰ سلنه نوره برېښنا بیا په کور دننه د بندونو او ډیزلي جنراتورونو په وسیله تولیدیږي.
