ارزگان ولایتی‌نینگ مرکزی ترینکوت‌ده 8 آیدن بویان کمیده 11 حربی عسکر طالب‌لرنینگ قورشاویده قالگن.
ارزگان ولایتی کینگشی اعضالریدن بیرقطاری‌نینگ ایتیشیچه، اوشبو پوسته 8 آی آلدین، طالب‌لر تامانیدن قورشاوگه آلینگن و حاضر قورشاوگه قالگن عسکرلر یمان وضعیت‌ده حیات کیچیره‌دیلر. اولر، ارزگان امنیتی رسمی‌لرینی بوتوغریده بی‌فرق یانده‌شیش‌گه عیب‌له‌یدی.
مذکور پوسته، ترینکوت‌نینگ مهرآباد منطقه‌سیده جایلشگن.
ارزگان ولایتی کینگشی باشلیغی امیرمحمدخان بارکزی‌نینگ سلام‌وطندارگه ایتیشیچه، بیرینچی‌دن مذکور پوسته‌ده چمه‌سی 140 حربی عسکر موجود ایکن، بیراق آتیشمه‌لر نتیجه‌سیده، 40 عسکر هلاک ایتیلگن.
جناب بارکزی‌گه کوره، قوراللی طالب‌لر، کیچه تاماندن پوسته‌نی اوستیگه هجوم قیله‌دیلر و بو قورشاو تیزلیک‌ده سیندیریلمه‌گن صورتده، عسکرلرنینگ برچه‌سی طالب‌لر تامانیدن اولدیریله‌دی.
ارزگان ولایتی کینگشی باشلیغی‌نینگ ایتیشیچه، بو مسئله‌نی حربی کینگش‌ده هم بیان ایتگن.
باشقه تاماندن، ارزگان ولایتی کینگشی مسؤول‌لری‌نینگ ایتیشیچه، اوشبو ولایت‌ده امنیتی اداره‌لرگه کیریتیلگن اوزگریش امنیتی وضعیت‌گه یاردم بیریش اورنی‌ده وضعیت‌نی یمان قیلگن.
بیراق، ارزگان پولیس قومندانی غلام‌فاروق سنگری، مهرآباد ده حربی عسکرلر قورشاوگه آلینگنینی رد قیلیب ایتیشیچه، کونده امنیتی کوچلر، مذکور ولایت‌نینگ ایریم منطقه‌لریده تازه‌لش عملیات یولگه قویه‌دیلر.
205 اتل قول اردو قومندانلیگی مطبوعات مسؤولی محمدصادق عیسی‌نینگ ایتیشیچه، مهرآباد ده حربی کوچلر پوسته‌سی قورشاوگه آلینمه‌گن، یالغیز اوشبو پوسته‌گه باره‌دیگن اکمالاتی یول توسیلگن و اولر مذکور پوسته‌گه هوا یولی آرقه‌لی یاردم ییتکیزه‌دی.
