افغان ګډو ځواکونو د هلمند ناوې ولسوالۍ مرکز بېرته ونیولو

۲۱۵ میوند قول اردو د هلمند ناوې ولسوالۍ د بېرته نیولو له‌پاره د ګډو ځواکونو عملیات پيل کړي، چې مشري یې د میوند قول اردو مرستیال جنرال عبدالغني کوي.

جنرال عبدالغني سلام وطندار ته وویل، په عملیاتو کې یې پرمختګ کړی، د ناوې ولسوالۍ مرکز یې نیولی او دولتي ځواکونه د پرمختګ په حال کې دي. 

دی وایي، د عملیاتو پرمهال لوی کلی، د عینک ماموریت، سپینه کوټه او د فضل الدین دوه لارې افغان ګډو ځواکونو نیولي، چې دمګړۍ د ولسوالۍ نورو سیمو کې عملیات روان دي.  

د جنرال عبدالغني په خبره، پياده جګړه افغان امنیتي ځواکونه کوي او په هوايي برخه کې د غوڅ ملاتړ ماموریت هوايي ځواک ورسره دی.

دی وايي، طالبانو په لارو کې ماینونه خښ کړي او افغان ځواکونه د ماینونو په پاکولو سره پرمختګ کوي. 

په ورته وخت کې د ملي امنیت یوې سرچینې د نوم نه خپرولو په شرط سلام وطندار ته وویل، چې د علمیاتو پرمهال د هوايي ګوزار په پایله کې ۱۶ طالبان وژل شوي دي.

طالبانو تراوسه په دې اړه څه نه دي ویلي، خو د سیمې اوسېدونکي وایي، اوس په هغو سیمو کې افغان ګډ ځواکونه لیدل کېږي، چې تردې مخکې طالبان په کې وو.