.jpg)
د افغانستان په سفر بوخته هندۍ معلولیت لرونکې کرکټ ملی لوبډله به سبا له کوربه افغان معلولیت لرونکې کرکټ ملي لوبډلې سره درېیمه لوبه په کابل کې وکړي.
د افغانستان او میلمه هندوستان معلولیت لرونکو کرکټ ملي لوبډلو ترمنځ د دوستۍ جام ترنامه لاندې پیل شویو سیالیو کې تراوسه دواړو لوبډلو یوه، یوه سیالۍ ګټلې ده او د سبا ورځې وروستۍ ۲۰ اوریزه لوبه ده، چې د اتلولۍ ګټلو لپاره پرېکړه کوونکې سیالۍ شمېرل کېږي.
د هندوستان معلولیت لرونکې کرکټ ملي لوبډله د افغانستان د کرکټ بورډ په رسمي بلنه تېره اونۍ کابل ته راغلې ده.
د افغانستان د کرکټ بورډ د رسمي وېیبپاڼې د معلوماتو له مخې افغان لوبډلې پرون د روان سیریز په دویمه لوبه کې د یوې په زړه پورې لوبې وروسته بریا خپله کړه.
.jpg)
د پرون ورځې په دویمه ۲۰ اوریزه لوبه کې چې د کابل په الکوزي کرکټ نړیوال لوبغالي کې وشوه، هندۍ لوبډلې له پچې ګټلو وروسته افغان لوبډلې ته د لومړۍ لوبې کولو بلنه ورکړه.
په سیالۍ کې افغان لوبډلې په لومړي وار کولو سره په ټاکل شویو ۲۰ اورونو کې د عبدالله اکبري د ۶۳ منډو په وسیله د ټولو لوبغاړو په سوځېدو ۱۶۶ منډې جوړې کړې.
ټاکل شوی هدف هندۍ میلمه لوبډلې ترلاسه نه کړی شو.
د افغانستان د کرکټ بورډ خبرپاڼه د خپل مرستیال عمومي مشر عزیزالله فضلي له خولې لیکلي، دا دویم ځل دی، چې د بشپړ غړیتوب هېوادونو لوبغاړي د سیالیو په موخه افغانستان ته رابولي.
فضلي وايي، چې دا د افغانستان د کرکټ د پرمختګ نښې دي او افغان کرکټ بورډ د ښې میلمه پالنې ترڅنګ د ښو لوبو زمینه هم برابرولی شي.
