.jpg)
د ولسمشر د فرمان په اساس شکرالله عاطف مشعل د نسیم الله دانش پر ځای د کرکټ بورډ د نوي مشر په ټوګه وټاکل شو.
د کرکټ بورډ د غړو په استازیتوب د مالیې وزیر اکلیل حکیمي د مشعل د معرفي کولو په غونډه کې وویل، عاطف مشعل د یوې رڼې پروسې په نتیجه کې د دوو نورو نوماندان له ډلې غوره شوی دی.
حکیمي وویل، مشعل د افغانستان کرکټ ودې ته ژمن دی او دی به هڅه وکړي، چې د کرکټ بورډ بودیجه زیات او لوبغاړو له پاره اسانتیاوې برابرې کړي.
دغه راز د مشرانو جرګې مشر فضل هادي مسلمیار وویل، بدلون د هرې ادارې اصل دی او د پخواني مشر نسیم الله دانش په شمول باید د کرکټ بورډ ټول غړي نوې پرېکړې ته د کرکټ د ودې په موخه غاړه کېږدي.
.jpg)
د مسلمیار پر وینا، عاطف مشعل د کرکټ بورډ غړو له خوا غوره شوی، د دوی په شمول حکومت یې ترشا ولاړ دی او هېچا ته به د خنډونو پیدا کولو اجازه ورنه کړي.
دغه راز د ولسي جرګې غړی نذیر احمدزي له عاطف مشعل وغوښتل، چې کرکټ د افغانانو د ارمانونو لوبه ده او باید د دوی هیلې ور پوره کړي.
شکرالله عاطف مشعل بیا په خپلو خبرو کې د پخواني مشر نسیم الله دانش د کارکړنو ستاینه وکړه.
هغه په خپلو خبرو کې وویل، د اوس له پاره په ۶ برخو کار کوي، چې د افغانستان کرکټ پرمختګ ورسره تړلی دی.
مشعل ژمنه وکړه، د کرکټ سیسټم به جوړ کړي، چې په راتلونکي کې د دې ادارې مشران د یوې اډانې په اساس کارونه پر مخ ویسي.
.jpg)
دغه راز ویې ویل، چې شفافیت به رامنځته کړي، د لوبغاړو د انتخاب روښانه کړنلاره به برابره کړي او هڅه به وکړي د کرکټ بورډ اداره یو ملي او مستقله اداره جوړه کړي.
نوموړي زیاته کړه، د کرکټ په سترو پرېکړو کې به د افغانستان د کرکټ ملي لوبډلې پخوانیو لوبغاړو، په کرکټ پوه کسانو او دغه راز د هېواد له ورزشي خبریالانو سره د مهالنۍ مشورو زمینه برابره کړي.
د یادونې ده، چی نسیم الله دانش ۲ کاله مخکې د ولسمشر په فرمان د وخت اجرایوي مشر ډاکټر نور محمد مراد پر ځای د افغانستان کرکټ بورډ مشر ټاکل شوی وو.
نوموړی وروسته له هغې له دندې لرې کړای شو، چې د شاپور ځدراڼ او شفیق الله شفق په شمول یو شمېر کرکټ لوبغاړو پرې سختې نیوکې وکړې، چی په ټولنیزو رسنیو کې د مخالفت ترڅنګ په ځینو ولایتونو کې لاریونونه هم وشول.
