د وسله والو طالبانو له لوري د څوو ورځو له پاره د کندوز ښار نیول کېدل او په دې ولایت کې روانې نښتې د دې لامل شوي دي، چې شاوخوا ۲۰ زره کورنۍ له خپلو مېنو بې ځایه شي.
دغه بې ځایه شوې کورنۍ وايي، چې کندوز دوی ته نور د پخوا په څېر نه دی.
مېرمن روبینه له خپل معیوب خاوند سره پر کندوز ښار د وسله والو طالبانو له برید وروسته پلازمېنې کابل ته را کډه شوې ده.
دغه مېرمن له خراب اقتصادي حالت نه شکایت کوي او وايي، چې د جګړې له سیمې یې د تېښتې پر وخت د موټر کرایه را قرض کړې ده.
روبینې وویل، تر اوسه پورې حکومت ور سره هیڅ ډول مرسته نه ده کړې او نه غواړي بېرته کندوز ښار ته کډه شي.
د دغې مېرمنې کېسه د کندوز ولایت د زرګونو بې ځایه شویو کورنیو کیسه ده او د ځان خوندیتوب په پار یې خپل ټول شته پریښي دي او کابل او نورو ولایتونو ته کډه شوي دي.
دغه کډوال وايي، چې نور په کندوز کې د اوسېدو څخه مطمین نه دي.
په ورته وخت کې د کډوالو چارو وزارت کندوز ته د ۷۰ سلنه د بې ځایه شویو کورنیو د بېرته ورستنېدو خبره کوي.
دغه وزارت وايي، چې د بې ځایه شویو کورنیو سره د مرستې له پاره ځانکړې بودیجه نه لري او تر اوسه پورې د بې ځایه شویو کورنیو سره شوې مرستې د «یو.ان.اچ.سي.ار» او «ډبلیو.اف.پي» له خوا شوي دي.
د کډوالو چارو وزارت مطبوعاتي سلا کار حفیظ احمد میاخېل وايي، چې تر اوسه پورې له ۲۹۴۸ مستحقو کورنیو سره د پېژندنې وروسته مرستې شوي دي او هغه کورنۍ چې بېرته دغه ولایت ته نه ورستنیږي؛ هغوی به د ملګرو ملتونو د پنا غوښتونکو عالي کمشنرۍ ته ور وپېژندل شي.
میاخېل وویل، د کندوز ولایت زیات شمېر بې ځایه شوې کورنۍ د خوراکي توکو او سرپناه نشتوالي ستونزو سره مخ دي.
دی زیاتوي، چې تر اوسه پورې په کابل کې د کندوز ولایت څخه راغلو ۹۰۰ تنو سره د نړیوالو بنسټونو له خوا د خوارکي توکو او د کورني لوخو مرسته شوې ده.
د کډوالو چارو وزارت د ننګرهار له ولایت څخه د شاوخوا ۶ زره کورنیو د بې ځایه کېدو خبر هم ورکوي او وايي، چې دغه بې ځایه شوې کورنۍ د بټي کوټ، کوټ او اچین ولسوالۍ اوسېدونکي دي.
