د آیسا یا د افغانستان د پانګې اچونې د ملاتړ ادارې سرپرست محمد ابراهيم شمس وايي، چې نن چهارشنبه (۲۰۱۵ م زېږدیز/ ۲۷مې) شاوخوا ۵۰ غېر مسووله وسله وال غوښتل، چې پر دغه ادارې کودتا وکړي او د ټوپک په زور درې کسان په لوړو څوکيو کې مقرر کړي.
نوموړي سلام وطندار ته په خبرو کې وویل، چې دغه کسان د تجارت وزارت له لوري ليږل شوي وو او غوښتل يې په غير قانوني ډول د اجمل وزيري په نوم د آیسا ادارې د مرستيال په توګه، خادم حسېن فطرت د پانګونې د مرستيال په توګه او احمد ویس ترکی د صنعتي پارکونو د مرستيال په توګه پر دندو وګماري.
ابراهیم شمس زیاته کړه، چې دغه وسله وال د پولیسو په رنجر او زرهي موټرو کې راغلي وو.
نوموړي وايي، چې دوی سم د واره ولسمشرۍ ماڼۍ ته خبر ورکړ او ولسمشر سمدستي د پېښې په اړه پلاوی وټاکه او دغه کسان د ولسمشرۍ ماڼۍ امنيتي مسوولينو له لوري وشړل شول.
د ملي وحدت حکومت د جوړېدو څخه وروسته د تجارت وزارت د اجرايوي رییس دویم مرستيال محمد محقق ته ورسېد او داسې ويل کيږي، چې دغه کسان د محقق ډلې پورې اړوند وو.
خو محقق ته يوې نږدې سرچينې د نوم نه ښودلو په شرط سلام وطندار ته ويلي، چې دوی په دغه موضوع کې دخيل نه دي او هيڅ ډول معلومات نه لري.
په دې اړه مو وغوښتل د سوداګرۍ وزارت نظر هم ولرو، خو په دېرو هڅو سره بريالي نه شو.
یاده اداره په خپل فیسبوک پاڼه کې هم د دغو کسانو تصويرونه خپاره کړي.
د آیسا یا د افغانستان د پانګې اچونې د ملاتړ ادارې د اصولو له مخې د هر شخص مقررېدو له پاره باید د پانګونې ادارېعالي کميسيون اوه کسيزه ډله پريکړه وکړي.
د دغه کمېسیون ۷ کسیزه ډله ټول وزیران دي.
خو د آیسا ادارې سرپرست په وينا دوی پرته له دې، چې دغه کمیسيون په جريان کې واچوي مستقيم راغلل او غوښتل يې، چې د ټوپک په زور مهم پوسټونه خپل کړي.
همدا ډول سرچينه وايي، له قانوني لارو او مسلکي اشخاصو پرته به زورواکۍ ته غاړه کې نه ږدي.
