د دایکندي محلي مسوولان وايي، د دغه ولایت د کجران ولسوالي د جنايي جرمونو پر وړاندې د مبارزې امر له یوه درې کلن ماشوم سره یوځای وژل شوی دی.
د دایکندي په امنیې قومانداني کې د جنايي جرمونو پر وړاندې د مبارزې مسوولان تاییدوي چې د کجران ولسوالي د جنايي جرمونو پر وړاندې د مبارزې امر عیسا ستېز او یو درې کلن ماشومان د دې ولسوالي په «ناوه رود» سیمه کې په ډزو وژل شوي دي.
د دایکندي د جنايي جرمونو پر وړاندې د مبارزې مدیر محمد مجاهد وايي چې نوموړی د دندې لپاره د کجران ولسوالي «ناوه رود» سیمې ته تللی و او د شپې نهه نیمې بجې د یوه خپلوان په کور کې وژل شوی دی.
د هغه په وینا، تر اوسه د دغه قتل انګېزه نه ده روښانه، خو په اړه یې څېړنې روانې دي.
کجران د دایکندي د ناامنه ولسوالیو له ډلې یوه ده. په دې ولسوالي کې ډېر کله د طالبانو او امنیتي ځواکونو ترمنځ سختې نښتې هم کېږي.
