له مارچ میاشتې رانیولې تر اوسه د ننګرهار ولایت په بېلابېلو ولسوالیو کې ۶ ښوونځي سوځول شويدي.
پهدې اورلګونو کې پر کتابونو او قرانکریمونو سربېره زیاته اندازه پوهنیز اداري اسناد، لابراتواري مواد، څوکۍ، دروازې او کړکۍ سوځولېدلې دي.
تازه – تازه همدا تېره شپه د دې ولایت په بټيکوټ ولسوالۍ کې وسله په لاس کسانو د کپتان بابا په نوم منځنی ښوونځی په بشپړ ډول سوځولی دی.
د ننګرهار د پوهنې ریاست د پېښې پخلی کړی او ویلي یې دي چې وسلهوالو کسانو یاد منځنی ښوونځی کاملاً سوځولی او یوازې تشه ډانچه یې پاتې ده. پهدې منځني ښوونځي کې د ۱۵۰ نجونو په ګډون نږدې ۸ سوه زدهکوونکیو زدهکړې کولې.
دا ښوونځی د بټيکوټ ولسوالۍ د ګړباوې په سیمه کې دی چې یاده سیمه بیا مومندرې ولسوالۍ سره نږدې پرته ده چېرته چې روان کال ۳ ښوونځي سوځول شويدي.
د پوهنې ریاست ویاند اصف شینواری وايي، هر مهال حکومتي لوړپوړي چارواکي له احتمالي خطراتو خبروي؛ خو د ښوونځیو ساتنې ته جدي پام نهکېږي.
ننګرهار هم لکه د نورو ډېرو ولایتونو دوه موسمه، سردسیر او ګرمسیر، ښوونځي لري چې بټيکوټ او شاوخوا سیمې یې په ګرمو سیمو کې راځي او اوس دغه ښوونځي د دوبي ۳ میاشتنۍ رخصتي لري.
د ننګرهار ولایتي شورا غړي هم دې کار اندېښمن کړيدي. دوی د ښوونځیو او پوهنیزو بنسټونو سوځول د هغو کسانو کار ګڼي چې غواړي هېواد کې د پوهنې ریښو په ویستلو سره افغانان همداسې په ناپوهۍ کې وساتي.
د ولایتي شورا غړی اسرارالله مراد سلام وطندار سره اړیکه کې هغه ګونګوسې هم د پام وړ وګڼلې چې ګوندې ښوونځیو کې د موجود فساد او جعلي اسنادو جوړوونکي د خپلو شواهدو د ورکولو لهپاره مکتبونه سوځوي.
دی وايي، حکومت د پوهنیزو بنسټونو په ساتنه کې ناکام دی او دې برخې ته د اړتیا تر حده پام نهکېږي.
ولسي خلک د اندېښنې په څرګندولو سره حکومت پړ ګڼي چې د پوهنیزو ادارو امنیت په سم ډول نهشي ساتلی.
دوی وايي، حکومت تل د اقداماتو خبره کوي؛ خو په عمل کې یې بیا هېڅ نهوي.
پوهنې وزارت هم له امنیتي ادارو غواړي چې د ښوونځیو امنیت دې ټینګ او د هر ډول پېښو مخنیوی دې وکړي.
په ورته وخت کې د ننګرهار د والي ویاند عطاالله خوږیاڼی سلام وطندار ته وايي، ځايي حکومت پهدې اړه له مرکزي ادارې سره دا ستونزه پر وخت شریکه کړې او ژر به د ښوونځیو د ساتنې لهپاره اړین ګامونه پورته شي.
پر حکومتي غاړې نیوکه پر دې وي چې تل یې د پېښو له رامنځته کېدو وروسته یوازې د جدي اقداماتو خبره کړې؛ خو له پېښو وړاندې یې د کړنو څرک نه لیدل کېږي.
تر اوسه په ښکاره ډول کومې وسلهوالې ډلې ننګرهار کې د ښوونځیو د سوځولو پړه نهده منلې؛ خو تېرې روژې میاشت کې بیا د داعش ډلې په نوم ځېنې اخطاریه خبرپاڼې او غږیز کلیپوڼه خپاره شويوو چې د نجونو د ښوونځیو د الوزولو ګواښ یې پهکې کړیو.
