د نړېوالو رسنيو د راپور له مخې وروسته له هنګري نه اوس کرواشيا هم د سوري او نورو افریقايي هېوادونو د کډوالو پر مخ خپل سرحدي لارې بندې کړې.
د کرواشیا چارواکي وايي، چې کله هنګري د کډوالو پرمخ خپل سرحدونه بند کړل، نو دغه هېواد ته ۱۳ زره کډوال راغلي او دوی پرته له بندولو بله چاره نه لري.
د ياد هېواد د کورنيو چارو وزیر "رانکو اوسټوحک" ویلي، چې له حده زیات کډوال د دوی هېواد ته ورغلي او په وينا يې نور يې هېواد د زیاتو کډوالو د ساتلو ظرفیت نه لري.
هغه زياته کړې، چې یواځې کرواشیا نه، بلکې یونان، سربیا او مقدونيه له لارې هم کډوال کولی شي، چې اروپايي هېوادونو ته لاړ شي.
د اوسټوحک په خبره، کرواشيا اروپا ته د تللو لاره نه ده.
له دغه اعلان وروسته اوس ځينې کډوال د بسونو او ریل ګاډو په واسطه بېرته تګ پېل کړي.
کرواشيا د خپل سرحد شاوخوا د یو لوی دیوال پر جوړولو هم پېل کړی.
یاده دې وي، چې اوس هم په زرګونه کډوال د کرواشيا په سرحدونو کې بند پاتې دي.
