د فوربز په نامه امریکايي مجلې د نړۍ د ۱۰۰ ځواکمنو ښځو نوملړ خپور کړی، چې په هغې کې د جرمني هېواد لومړۍ وزیره انګیلا مېرکل د تېرو پنځو کلونو په څېر بیا لومړی مقام ګټلی دی.
امریکايي مجلې فوربز د نړۍ ځواکمنو ښځو دغه نوملړ د زیاتې سرمايې، رسنيز اغېز او ټولنیز اغېز پر بنسټ جوړ او خپور کړی دی.
امریکايي مجله فوربز هر کال د نړۍ د ځواکمنو ښځو دغه ډول نوملړ خپروي، چې جرمنۍ لومړۍ وزیره انګېلا مېرکل هغه څوک ده چې په پرلپسې ډول د پنځم ځل له پاره د دغه مقام ګټونکې کېږي.
دغې مجلې انګېلا مېرکل په بېلابېلو برخو کې د ښو پالیسیانو د جوړولو له امله په دغه نوملړ کې په لومړۍ درجه کې راوستې ده.
په دغه نوملړ کې د امریکا د بهرنیو چارو پخوانۍ وزیره هیلري کلېنټن په دویم مقام کې ځای لري، په داسې حال کې چې په تېرو کلونو کې په ۲۴ نمبر راغلې وه.
د بېل ګېټس ښځه په دغه نوملړ کې ۳ درېیم ځای لري.
په ټولیزه توګه په دغه ۱۰۰کسیز لېست کې د وروسته پاتې هېوادونو ۸ ښځې هم شاملې دي، په داسې حال کې چې همدا ۱۰۰ ښځې هر کال په یو ټریلیون ډالر کاروبار کوي او د کنټرول له پاره یې مناسبې لارې چارې لري.
د یادونې ده، چې په نوملړ کې ۱۵ عربې ښځې هم شاملې دي.
د روان کال په دغه نوملړ کې ۱۹ نوې ښځې ور اضافه شوې، چې په هغې کې یوه د تر ټولو د کم عمر لرونکې سندرغاړې سویفټ هم شامله ده، چې په دغه نوملړ کې یې ۶۴ ځای ګټلی و.
