د کاناډا په کبک سیټي جومات کې د نامعلومو وسلهوالو لهخوا په ډزو سره ۵ تنه وژل شوي او ګڼ نور ټپیان شوي دي.
برید د کبک سیټي په «چیمین سېنټ فوی» جومات کې شوی دی.
اسوشېټېډ پرېس لیکلي دي، چې دا پېښه تېره شپه ناوخته د کبک سيټي په «اسلامي ـ کلتوري مرکز» کې په داسې حال کې شوې، چې خلک د لمانځه د ادا کولو له پاره جومات ته راټول شوي وو.
د جومات د چارو مشر محمد ینګوی، چې د برید پرمهال د جومات د ننه و، رویټرز خبري اژانس ته ویلي، نه پوهېږي چې څومره کسان ټپیان شوي؛ خو د کبک روغتونونو ته وړل شوي دي. ده دا یو وحشي عمل ګڼلی دی.
د دې اسلامي ـ فرهنګي مرکز مشر وايي، چې جومات کې شاوخوا ۴۰ تنه وګړي د لمانځه لهپاره ورغلي وو، چې ۳ تنه ترهګر جومات ته ننوتل او په ډزو کې یې ۵ تنه ووژل. ، خو پولیسو تر اوسه په رسمي توګه د وژل شویو او ټپیانو رسمي شمېرې نه دي اعلان کړې.
د کبک پولیسو رسنیو ته د پېښې په تور د دوو کسانو د نیولو خبر ورکړی دی.
د برید د انګیزې په اړه تر اوسه څه نه دي ویل شوي. خو د کبک یو چارواکي فیلېپ کویلارډ دا «یو ترهګریز عمل» بللی.
خو وروسته پولیسو سیمه کې وضعیت تر کنټرو لاندې نیول دی.
د کاناډا صدراعظم جاسټن تروډو په خپلې ټویټر پاڼې د برید غندنه کړې ده او د قربانیانو له کورنیو سره يې غمشریکۍ کړې ده.
