ټاکل شوې ده، چې د افغانستان فوټبال فدراسیون په نوښت د افغانستان څلورم پړاو فوټبال (غوره لیګ) سیالۍ د روانې اګست میاشتې په ۲۷ مه نیټه په کابل کې پېل شي.
ددې سیالیو له پاره د لوبډلویش پچه اچونه په کابل کې د ځانګړو مراسمو او لوړو پوړو حکومتي او ولسي استازو په شتون کې په ځانګړو مراسمو کې ترسره شوه.
د افغانستان فوټبال فدراسیون د یوې خبرپاڼې په خپرولو سره وایي، چې په سیالیو کې به د پخوا په څیر د هیواد د ۸ زونونو منتخبې فوټبال لوبډلې برخه ولري.
پدې سیالیو کې د مرکز زون شاهین اسمایي لوبډله د خپلې تیرې اتلولۍ څخه دفاع کوي چې تیرکال یې سیمرغ البرز لوبډلې ته په ماتې ورکولو سره ترلاسه کړې وه.
د پچې اچونې په پایله کې لوبډلې په ۲ ګروپونو کې وویشل شوې چې په لومړي ګروپ کې به (عقابان هندوکش ، موجهای امو ، د اباسین څپې اوسپین غربازان لوبډلې) او په دوهم ګروپ کې به (شاهین اسمایي ، سمیرغ البرز، طوفان هریرود او د میوند اتلان لوبډلې) ولوبیږي.
د افغانستان فوټبال فدراسیون لخوا ټولو اته واړو ګډون کوونکو لوبډلو ته د کورنیو روزونکو په ګډون د ګاونډیو هیوادونو بهرني روزونکي هم ګمارل شویدي او اوسمهال په کابل کې له خپلو لوبډلو سره یوځای دي.
د افغانستان فوټبال غوره لیګ سیالۍ د لومړي ځل لپاره په ۲۰۱۲ کال کې پیل شوې چې په لومړي ځل پکښې طوفان هریرود لوبډلې داتلولۍ جام ترلاسه کړ.
د هغې وروسته پرله پسې دوه ځلې شاهین اسمایي لوبډلې په ۲۰۱۳ او ۲۰۱۴ کلونو کې خپلو سیالانو ته په ماتو ورکولو سره داتلولۍ جامونه وګټل.
د افغانستان فوټبال غوره لیګ سیالیو د چارواکو په وینا چې د تیرپه څیر به د غوره لیګ ټولې سیالۍ د اونۍ په دریو ورځو چهارشنبه ، پنجشنبه او جمعې په ورځو کې مازیګر ۴ بجې د افغانستان فوټبال فدراسیون په (ګول) لوبغالي کې ترسره کیږي چې د دوه خصوصي تلویزیونونو او دوی پورې ورته راډیوګانو له لارې به فوټبال مینه والو ته په ژوندۍ بڼه خپرې شي.
