د کورنیوچارو، ملي دفاع او غوڅ ملاتړ ځواکونو نن کابل کې د یوې خبري غونډې پرمهال د ټاکنو ورځې لهپاره د بشپړ امنیتي چمتووالي خبر ورکړ.
د کورنیوچارو وزارت ویاند نجیب دانش وايي، د رایاچونې مرکزونو او محلونو کې یې د امنیتي ځواکونو ځایپرځای کولو چارې نن سهار پیل کړي او د تلې میاشتې تر ۲۶مې به دوام وکړي.
د نوموړي په وینا، ۵۰ زره سرتېري به د ټاکنو ورځې امنیت نیسي او د اړتیا پرمهال به نور هم زیات شي.
په همدې حال کې د ملي دفاع وزارت ویاند غفوراحمد جاوېد وايي، له نورو امنیتي ارګانونو سره په همغږۍ د ټاکنو ورځې امنیت خوندیتوب لهپاره کار کوي او د ځمکنیو ځواکونو ترڅنګ به هوايي ځواکونه هم د خلکو او ټاکنیزو مرکزونو امنیت نیسي.
د امنیتي ادارو مسوولان زیاتوي، د ټاکنو پروسې د امنیت مدیریت د افغان ځواکونو پرغاړه دی.
بلخوا افغانستان کې د غوڅ ملاتړ ځواکونو ویاند کانت پېټر وايي، د ټاکنو پروسې اړوند ټولې امنیتي چارې د افغان ځواکونو پرغاړه دي او د غوڅ ملاتړ ځواکونه به پهکې هېڅ رول ونه لوبوي.
د کورنیوچارو وزارت مسوولانو په خبره، امنیتي ځواکونه د رایاچونې پرمهال د محلونو او مرکزونو امنیت ساتنې لهپاره ۳ کمربندونه جوړوي چې لومړی به یې ټاکنیزو محلونو او مرکزونو ته نږدې، دویم د یادو مرکزونو په شاوخوا ۴۰۰ مترۍ کې جوړ شي او درېیم هغه به یې سیارې ګزمې ولري.
