د هلمند د کجکي بند د درېیو توربینونو تړون لیک د افغانستان برښنا شرکت او د امریکا د پراختیایي ادارې (USAID) ترمنځ لاس لیک شو.
د بریښنا د شرکت ریيس قدرت الله دلاوري د سه شنبې په ورځ (اګسټ۱۶مه) په خبري غونډه کې وویل، چې د کجکي په بند کې د درېیم توربین په لګولو سره به ، ۱۸،۵ میگاواټ بریښنا تولید شي او د کجکي بند د بریښنا تولید به ۵۱،۵میگاواټو ته ورسیږي.
د دلاوري پر وینا ، درېیم توربین به په دوو راتلونکو میاشتو کې ولګول شي او ګټې اخیستنې ته به چمتو شي.
دلاوري زیاتوي، دغه ریاست هڅه کوي چې د هلمند او قندهار د محلي حکومت په مرسته، په ټاکل شوي وخت کې د دوو توربینونو د جوړولو کار پیل او درېیم توربین ولګوي.
د بریښنا شرکت د ریيس پر وینا ، د کجکي په بند کې د درېیم توربین په لګولو سره به ، ۱۸ تر ۱۹ زره کورنۍ په هلمند او قندهار ولایتونو کې له دې بریښنا نه ګټه واخلي.
په همدې حال کې، د امریکا د پراختیایي ادارې رییس "جیرماکریو" د دې تړون لیک په غونډه کې وویل ، چې هغوي ۲۰۱۳ م ز کال نه راپدیخوا د افغانستان د بریښنا په برخه کې ۸۰۰ میلیونه ډالر لګولي دي.
د بریښنا شرکت ريیس وایي، چې د هیواد په ځینو ناامنه سیمو کې، طالبان له خلکو څخه د لګول شوې بریښنا پیسې خپل ځان ته اخلي.
د کجکي بند کار په ۱۳۳۲م لمریز کال کې پیل شو. د دې بند فعالیتونه په هیواد کې د ۱۶ کلونو ناامنیو له امله د کجکي په ولسوالۍ کې څو ځله بند شوی وو.
