راپورونه وايي، چې افغان چارواکي د پاکستان سره په هوکړه شوي اقتصادي ناسته کې د ګډون په موخه نه دي حاضر شوي.
دغه غونډه د "ګډ اقتصادي کمېسيون" یا (JEC) په نوم نومول شوې وه.
په پام کې وه، چې نن سه شنبه اګست ۲۵ مه په اسلام اباد کې د پاکستاني چارواکو سره افغان اقتصادي سکټور ځينې مشران یوه ناسته ولري، خو دغه ناسته نن د ولسمشر غني له لوري په کابل کې د وروستيو بريدونو له امله لغوه شوې ده.
افغان ولسمشر د کابل په شاه شهيد سيمه کې د تروریستي بريد له امله پر پاکستان سخت انتقادونه وکړل او دغه هېواد يې د تروریزم ملاتړ کوونکی وباله.
ولسمشر غني هغه مهال خبري ناستې ته وویل، چې په وروستيو څو اوونيو کې به د پاکستان سره د افغانستان د نيو اړيکو ستراتيژي اعلان شي.
د افغانستان د ماليې وزیر اکلیل حکيمي خپل پاکستاني سيال اسحاق ډار ته ویلي، افغان حکومت پریکړه کړې چې مقامات يې باید په دغه ناسته کې ګډون ونه کړي.
د پاکستان تربيون ورځپاڼې د خپلې سرچينې نوم نه دی ذکر کړی، خو ويلي يې دي، چې دوی ته د افغانستان په ماليې وزارت کې یوې معتبرې سرچينې دغه موضوع تایید کړې.
د راپورونو پر بنسټ حکيمې هغه مهال خپل پاکستان سيال سره ټېلفوني اړيکه نېولې، چې د دغه هوکړه لیک تنظيمونکي د ناستې له پاره هرڅه چمتو کړي وو او د بې نظیر بوټو نړېوال هوايي ډګر کې د افغان پلاوي د راتګ شېبې يې شمارلې.
(JEC) په دغه لسمه ناسته کې په پام کې وه، چې د اقتصادي مسايلو په ټولو اړخونو باندې خبرې اترې وشي.
پلان داسې وو، څو په دغه غونډه کې په ۵۵ اقتصادي مواردو خبرې وشي، چې د راکړې ورکړې، ټرانسپورټي سیسټم او د کرښې په دواړو خواوو کې تجارتي قاچاق يې مهم موضوعات وو.
د افغانستان بیخ بناوو رغول او نورو ټولنیزو پروژو کې کار کول هم د دغې غونډې په اجنډا کې شامله وه.
سلام وطندار ته ځينې سرچينې د نوم نه ښودلو په شرط هم دغه موضوع تایید کړې.
په پام کې وه، چې پاکستان په دغو برخو مرستې کړي وی.
د پاکستان د ماليې وزیر اسحاق ډار ویلي، چې له څه مودې راهیسې يې د خپل افغان سيال سره په مهمو مسایلو غږېدلي وو او ټولې مهمې اقتصادي ستونزې يې په نښه کړي وو.
