د فاریاب ولایت امنيتي چارواکي وايي، چې د یاد ولایت په دولت اباد ولسوالۍ کې يوه نجلۍ او هلک د نجلۍ د پلار له خوا وژل شوي دي.
د فاریاب امنیه قومندان سیداقا اندرابي رسنيو ته د يوې خبري ناستې په ترڅ کې وویل، چې تېره شپه یوه پېغله نجلۍ او یو هلک د نامشروع اړیکو درلودلو په تور وژل شوي دي.
هغه وايي، چې په دې اړه د نجلۍ پلار د پولیسو له لوري نیول شوی او اوسمهال له دوی سره بندی دی.
له بل لوري د دولت اباد ولسوال سید عبدالسلام نزهت هم یاده پېښه مني او د سلام وطندار سره يې د خبرو پرمهال زیاته کړه، چې نجلۍ ۱۷ کلنه او هلک ۲۳ کلن و، چې د "چهارشنغو" په کلي کې د نجلۍ د پلار له خوا یو د بل سره د مينې لرلو په تور وژل شوي دي.
د فاریاب ولایت د دولت اباد ولسوال وايي، چې تر اوسه په دې تور ۳ تنه نيول شوي دي.
په همدې حال کې د فاریاب روغتون مسوولان وايي، دوی ته د یو هلک او يوې نجلۍ جسدونه رسیدلي او د عدلي طب څېړنې ښي، چې دغو دوو ته د چا له خوا زندۍ اچول شوي وي.
