د لوګر ولایت محلي چارواکي وايي، سلګونو وسلهوالو طالبانو بېګاه د دغه ولایت د برهکي برک ولسوالي پر امنیتي پوستو ډلهییز بریدونه کړي، خو په وینا یې، د افغان ځواکونو له لوري پر شا تمبول شوي دي.
د لوګر د والي ویاند دیداراحمد لونګ سلاموطندار ته وویل، افغان ځواکونو د طالبانو څو ډلهییز بریدونه پر شا تمبولي دي.
د نوموړي په وینا، د افغان ځواکونو او طالبانو ترمنځ په نښته کې ۱۵ طالبان وژل شوي او ۱۰ نور ټپیان دي.
لونګ زیاتوي، په جګړه کې ۳ افغان سرتېري هم وژل شوي او دوه نور ټپیان دي.
د لوګر د والي ویاند وايي، د یادو بریدونو پر مهال د طالبانو ګڼشمېر سپکې او درنې وسلې هم د افغان ځواکونو لاس ته لوېدلې دي.
وسلهوالو طالبانو تراوسه په دې اړه رسنیو ته څه نه دي ویلي.
دا په داسې حال کې ده چې طالبانو وړمه شپه د لوګر پر خروار ولسوالي هم ډلهییز برید کړی و چې د افغان ځواکونو له لوري بېرته پر شا تمبول شوی و او له کبله یې ۱۳ طالبان وژل شوي او ۷ نور ټپیان وو. دغه راز په دغه برید کې د ملي اردو دوه سرتېري وژل شوي او یو بل ټپي و.
